Nin siquiera los partíos más teoricamente favoratibles a la oficialidá de la llingua ufren a los sos votantes la posibilidá de votar na mesma, siendo nuevamente Andecha Astur la única formación que convalidó énte la Xunta Elleutoral les papeletes al Congresu y al Senáu n’asturianu

La puerta abierta cola sentencia algamada por Andecha Astur énte’l Tribunal Costitucional español fizo camentar que, una y bones que se sabe que la Xunta Elleutoral da por válides les papeletes en llingua asturiana, el restu de partios que nun son nidiamente belixerantes col asturianu s’apuntarien a ufrir esta opción de billingüismu a los sos votantes.

Sicasí, dengún d’ellos quiso sumase a esta amuesa de respetu a los asturfalantes, siendo nuevamente Andecha Astur l’únicu partíu en facelo, seique reconocen qu’esiste nello un pequeñu riesgu.

Nes pasaes elleiciones nacionales hebio dellos incidentes asociaos a estes papeletes, cuando pesi a ser dafechu llegales y tar reconocies pola Xunta elleutoral, foron dellos los apoderaos de los partíos mayoritarios que retiraren toles papeletes elleutorales escrites n’asturianu, pol simple fechu d’utilizar la nuesa llingua, fechu que foi silenciáu por interventores y apoderaos de tolos partíos, mesmo cuando se paralizaron les votaciones y se punxeron les correspondientes reclamaciones.

Nuria Prendes

This work is licensed under a Creative Commons Attribution 4.0 International License.