La macroespichona con más llagares del añu abre mañana les sos puertes nel Muséu del Pueblu d’Asturies de Xixón, con una importante ufierta d’actividaes prestoses venceyaes a la cultura sidrera que durarán dica’l domingu 21
Por namás 6€ los asistentes tendrán la posibilidá d’esfrutar y comparar la sidre del añu de más de 70 llagares, una oportunidá inmeyorable pa calibrar comu vien la sidre esti añu ya inaugurar la temporada sidrera cola pasión que correspuende a les feches.
La inaguración sedrá mañana xueves 18, a les 13:00 hores baxo’l Tendayu del Muséu. El pregón correrá a cargu del hestoriador Luis Beniro García, impulsor de la candidatura de la Cultura Sidrera Asturiana pal so reconocimientu como Padremuñu Cultural Inmaterial de la Humanidá por parte de la UNESCO y la presentación cuntará cola participación de Jesús Martínez Salvador, conceyal de Turismu, esportes, Festexos y Mocedá de Xixón, Marcos Fernández, presidente de la Fundación Asturies XXI, el llagareru Alfonso Prado, de La Morena y abondos representantes d’estremaes cofradíes gastronómiques, pente les que nun pueden faltar los Siceratores de Asturies.
Darréu entamarán les actividaes, culturales, d’arruelu, gastronómiques y por supuestu, sidreres, con esibiciones, talleres, tastia, cocina’n direutu, música y baille’l país, artesanía, xuegos pa la reciella y esportes tradicionales. Un de los eventos más esperaos ye’l concursu de sidre casero fecho en maera orientáu a llagareros non profesionales qu’empleguen el sistema tradicional d’ellaboración de sidre en pipa de maera, un de los pocos concursos de sidre casero d’ambetu nacional, pal qu’entá se puede unviar sidre pa participar na preba que tendrá llugar el domingu 21.
Los más piqueños tamién podrán esfrutar, ya que amás de la participación de los Sidrocoles, los xuegos y los talleres especialmente pensaos pa ellos, tamién podrán tastiar la bebida más asturiana na so versión más dolce cola sidre’l duernu.
La sidra oficial d’esta edición sedrá Prado y Pedregal, del llagar La Morena, ganaora del concursu La Meyor Primer Sidre L’Añu 2019 cellebráu’l sábadu pasáu. Cuntaráse tamién con una importante representación de les sidres que participaron nel Salón Internacional de les Sidres de Gala 2018 —SISGA’18—, asina como d’una interesante escoyeta de sidres internacionales. Tampoco faltará sidra dulce ya ensin alcol, pa que tol públicu pueda estrenar la sidre.
La Primer Sidre L’Añu ta entamá pola Fundación Asturies XXI cola collaboración de la revista LA SIDRA, nominaes les dos comu embaxaores Cultura Sidrera Asturiana. Tres d’una década de vida, la PSLA yá ye un referente sidreru añal col que se caltiene viva la tradición de les espiches de Semana Santa y del consumu de la sidre nuevo ensin trasegar.
Llucía F. Marqués
This work is licensed under a Creative Commons Attribution 4.0 International License.
