Pa los asturianos la Selmana Santa ye tiempu de sidre y folixa, de gayola contrapuesta a los vezos españoles de tristura y relixosidá. El Sidracrucis ye la única procesión 100% asturiana

Tiempu d’espiches, d’abrir toneles y tastiar el resultáu d’un añu d’espera y trabayu, a Selmana Santa abre oficialmente la temporada sidrera, y nella dos eventos son los protagonistes: la Primer Sidre l’Añu, que cellebra en Xixón la so décima edición, ya’l Sidracrucis, que con 26 ediciones ya multiplica por cinco los años d’otres cellebraciones menos nueses que nos medios nos quieren vender comu “tradicionales”.

Esti añu l’escenariu principal del Sidracrucis foi Xixón, con salida na plaza Pelayo y solemne procesión por seis sidreries de Cimavilla: Casa Rober, La Tabacalera, El Diablicu, El Veleru, La Casona Jovellanos y El Llavaderu, siguiendo les gaites y una botella sidre de metru y mediu.

De ehí pasaron pela Primer Sidre l’Añu, el Mallu del Infanzon, el llagar de Sidra Cabueñes y finalmente, Casa Pepito, en Pión. Los organizadores del Sidracrucis informen de que los penitentes nun carecieron daños tres de tan intensa demostración de pasión sidrera y tan toos en bones condiciones.

Llucía F. Marqués

This work is licensed under a Creative Commons Attribution 4.0 International License.