Andecha Astur aprofita l’interés polos monumentos hestóricos reveláu de magar la triesti quema de Notre Dame pa remembrar l’estáu d’esbarrumbe nel que s’alcuentren decenes de monumentos hestóricos asturianos
La formación reconoz la emportancia de los monumentos hestóricos “comu parte fundamental de la cultura ya la identidá d’una nación, polo qu’aprofitando la fola de solidaridá pa col padremuñu pidimos la recostrución de los nuesos monumentos en desaniciu”
Por ello, pidin a toles estayes de la sociedá asturiana que s’impliquen activamente na recuperación de les ruines hestóriques de les qu’Asturies ta enllena y que precisen d’una rápida intervención si nun se quier que desapaezan definitivamente nos años vinientes.
“La desapaición d’estos monumentos nun implica namás una perda arquiteutónica y artística d’enorme trescendencia, sinon que con ellos piérdese la posibilidá d’afondar na hestoria d’Asturies y de caltenela en pie pa xeneraciones venideres” recalquen.
La Torre de Soto, n’Al.ler, los monasterios de San Antolín de Bedón, en Llanes, San Salvador de Curniana y el de Santa María la Real d’Obona, en Tinéu, el palaciu los Faes de Miranda, en Carabanzo (L.lena), la casa los Bernaldo de Quirós, en Candás, el Palaciu de Faes, en L.lena o la ilesia de San Cipriano, en L’Infiestu, y la de San pedro de Plecín, en Peñamellera Alta son dalgunes de les suxerencies qu’Andecha Astur fae pa entamar a restaurar. Ensin escaecer tol prerrománicu asturianu, los castros, los horros y les paneres.
Nuria Prendes
This work is licensed under a Creative Commons Attribution 4.0 International License.
