El premiu, que valora la meyor composición orixinal n’asturianu de los dos años pasaos, cuntará por primer vegada con una recompensa económica de 6.000 euros pal tema ganaor
Dientro les actividaes la 40 Selmana les Lletres Asturianes, el teatru de La Felguera acoyerá mañana vienres 26, de magar les 8 la tardi, l’enfrentamientu pente Lafu y Rebeca , Los Berrones, la banda gaites el Trasno y Xaime Martínez. Amás d’ellos, actuarán los ganaores de la edición anterior, Luis Nuñez y los Folganzanes, que ganaron col canciu “La ñeve y la Esmeralda”
Esti añu la gala aconceya músicos d’estremaos estilos y estremaes veteranies, dende’l cantante más nuevu, Xaime Martinez, que compite col so “Discursu de Belarmino Tomás ente los soldaos mentes camina sobre les agües del ríu Nalón”, del so discu “Osculos d’agua nel Imperiu Asturianu”, fasta los míticos Los Berrones que dende Tolivia traen “¿Esto pa qué val?”con lletra de Ramón Blanco y música d’Olegario Méndez. Lafu y Rebeca presenten un tema intimista na voz de la polifacética direutora de la Escuela de Música de Grao, ‘Les sombres sobre la yerba’, composición del propiu Alejandro Lafuente, y la Banda Gaitas El Trasno con ‘Oldenburg’, creada por Kike Dembinsky.
El xuráu tará compuestu por músicos y especialistes en llingua asturiana y la entrada ye de baldre.
Llucía F.Marqués
This work is licensed under a Creative Commons Attribution 4.0 International License.
