Asturies quédase sola nel camín de retrocesu llaboral, col 57% de les persones n’edá de trabayar, ensin emplegu y 900 persones menos nesa mesma franxa d’edá

Los datos de la EPA (Encuesta de Población Activa) recueyen en cifres la situación de la población ya’l mercáu llaboral asturianu, espeyando que, comu s’esperaba, el declive demográficu continúa, especialmente pente la xente n’edá de trabayar.

En concretu, hai 900 persones menos d’ente 16 y 70 años nel caberu trimestre, -5.200 nel caberu añu y -54.700 nos caberos once años, siendo la evolución asturiana la más esmoleceora del estáu nesi sen.  De les persones que queden n’Asturies n’edá de trabayar, namás el 43% tan ocupaos.

En comparanza col estáu español, namás n’Asturies se destruyó emplegu nel caberu añu, ello ye, mientres equí se sigue perdiendo puestos de trabayu n’España l’emplegu medra un 3’16%. Estos puestos perdios correspuenden principalmente al seutor servicios, onde se perdieron 6.000 puestos, lo que puede indicar que la estratexa d’utilizar el turismu y la hostelería comu mediu de dar puxu al país nun ta furrulando.

El paru allúgase nel 15’04%, perriba la media española, duplicándose pente la mocedá, (29’59%) y algamándose los 29.900 paraos de llarga duración, que nun cobren desemplegu. Aumenta, amás, la precariedá, subiendo a cuasi’l 15% el númberu de contratos a tiempu parcial y subiendo la tasa de temporalidá del emplegu fasta cerca d’un 25%. Pesi a la “recuperación” que dicen que tamos viviendo nestos caberos 6 años l’indiz de temporalidá medró 3’1 puntos.

En resume, Asturies sigui el camín descendente qu’anició hai tiempu: hai menos trabayu y de pior calidá, y síguilu’n solitario, demientres el restu l’estáu español recueye cifres de recuperacion. Consecuentemente, la emigración ye forciada, la natalidá queda paralizao, y la demografía, cae.

Llucía F. Marqués

This work is licensed under a Creative Commons Attribution 4.0 International License.