Arturu Xosé Bermeyu, candidatu y apoderáu por Andecha Astur, foi reteníu cuando intentaba facer cumplir la llei que prohibe llevar armes nos colexos elleutorales.

El de San Pedro de los Arcos nun foi l’únicu incidente: en dellos colexos de Xixón foi necesario dar avisu y la Xunta Elleutoral tuvo d’intervenir pa que los policies armaos salieren de los colexos elleutorales y nel Riu Piles de Xixón  taben retiraes les papeletes d’Andecha Astur

El policía nacional coles armes dientro’l colexu elleutoral

Sobro la una de la tardi Arturu Xosé Bermeyu acudió a posar el so votu al colexu que-y correspondía, decatándose darréu de la presencia de policía nacional armada dientro del recintu elleutoral, daqué esplicitamente prohibío pola llei elleutoral española cola única esceición de situación d’inseguridá, casu que nun se daba.

Ante l’incumplimientu de la llei, igual que ya fexeren a lo llargo la mañana dellos apoderaos que vieron la mesma situación n’otros colexos, Bermeyu dio avisu a la presidencia de la mesa, que se negó a intervenir pa facer cumplir la normativa elleutoral, neto que’l restu d’apoderaos presentes, polo qu’elli mesmu foi a recorda-y el so deber al policia, entrugándo-y si dalgún miembru de la mesa requiriera la so presencia ya indicando-y que, en casu contrariu, tendría que salir, ante lo que non solo se negó a salir sinon que foi l’apoderáu l’identificáu y reteníu por cinco axentes.

El candidatu interpuso ya la so denuncia ante’l xulgau de guardia pola presencia de policía armada nel interior del colexu.

Nos otros colexos nos que se detectó esta irregularidá tampocu se cuntó col gabitu de los presidentes de mesa nin apoderaos del restu de partidos, que decidieron facer la vista gorda y nun s’enfrentar a los policíes, pero depués de que la Xunta Elleutoral fore informada polos apoderaos d’Andecha acataron la llei y salieron ensin protagonizar más incidentes.

Redaición InfoAsturies

This work is licensed under a Creative Commons Attribution 4.0 International License.