El PIB asturianu ye’l más baxu del norte peninsular ya’l sétimu peor del estáu
L’analís del PIB per cápita por comunidaes del añu pasáu recueye la desigualdá territorial esistente dientro l’Estáu español. Nesi escenariu, Asturies tien namás a 6 comunidaes y les dos colonies africanes d’España, Ceuta y Melilla, perbaxo d’ella, toes elles nel Sur.
Los datos recién apurrios pol INE, correspondientes al 2018 (recoyendo, poro, datos de feches previes a los caberos grandes preslles) alluguen a Asturies comu la comunidá con menor nivel de riqueza del Norte. De fechu, queda nun 89’3% de la media estatal, siguía de Galicia, col 90’1% y Cantabria, con más d’un 92%.
En contraposición, los territorios con meyores porcentaxes del Norte, que superen con muncho la media estatal y tan a la tiesta de riqueza son precisamente aquellos que se carautericen por polítiques propies, ello ye, el Pais Vascu, con un 132’8%, Navarra, con un 123% y Cataluña, col 119%.
Hai quiciás una esperanza nel fechu de que’l xorrecimientu algamáu pente’l 2000 ya’l 2018 ye de los meyores, pa lo que nun puede perdese de vista la desplicación que dan los espertos a esta meyora “El raigón industrial y la escasa dependencia del turismu y la costrución pueden desplicar esta aparente contradición y xustificar el xorrecimientu relativu del PIB asturianu”. Asina les coses, los espertos aconseyen l’abandonu de la tendencia turistizante d’Asturies y la puesta en marcha d’una política industrial coherente, cientrada na industria tresformadora, que permita a Asturies xorrecer y recuperar el so puestu natural a la tiesta de bayura.
Llucía F. Marqués
This work is licensed under a Creative Commons Attribution 4.0 International License.
