El Conceyu de Villaviciosa vien d’informar de que dan una segunda prórroga de 3 meses a la empresa Derivaos Llácteos, allugada en Villaviciosa pa iguar los numberosos defeutos que tienen nel procesu, que tán xenerando daños a los collindantes

Pa que se tomaren les midies de control d’esta actividá foi precisa la denuncia de la Coordinadora Ecoloxista y de los vecinos, dandoseyos ensin previa comprobación les llicencies d’actividá y furrulamientu. Una vegada que se comprebaron los fechos denunciaos, dióseyos un plazu pa iguar les irregularidaes, durante’l que nun avanzaron res, y agora concédeseyos otru.

Los vecinos vienen quexándose de los fuertes golores que s’esprenden presuntamente de l’actividá, xenerando una importante contaminación olfativa qu’amenorga la so calidá de vida.

Tamién denuncien los vecinos que tantu los vehículos como la ropa, apaez enllordiada con partícules blanques, presuntamente procedentes del procesu de lleche’n polvu que se realiza na empresa.

Esta segunda prórroga, de tres meses, vien depués de que na primera nun s’acometiere dala obra pa desaniciar los graves problemes del procesu, ello ye, que continuen los arramaos de llechi ensin tratamientu, el non usu de les istalaciones de pre tratamientu, que nun se ve’l procesu de neutralización, nin tampoco la instalación de tratamientu biolóxicu por aciu aireación comprometida nel proyectu y la falta d’un filtru secu de mangues que recueya la lleche en polvu evaporizada nel procesu d’ensugáu. Arriendes de tou ellu, el rúiu xeneráu poles istalaciones afeuta a les viviendes averaes, ensin que s’entamaren les llabores d’insonorización.

This work is licensed under a Creative Commons Attribution 4.0 International License.