Ayeri alrodiu les 17 la tardi los primeros efeutivos del cuerpu de Bomberos poníense’n marcha ante l’apaición de delles quemes na fastera cientral. A les 19:46 de la tardi, a la vista de la dificultá de controlar el fuéu por mor del fuerte vientu que, amás, desplazó’l fumo a fasteres urbanes comu Xixón y Villaviciosa, activóse’l Plan d’Incendios Forestales del Principado de Asturies (INFOPA) en fase d’emerxencia,  SITUACION 0, aplicable a un o dellos incendios nun ámbetu xeográficu determináu y que pueden ser controlaos. Dos hores más tardi, la fase subió a SITUACIÓN 1, ya que se vió que l’incendiu declaráu na Sierra de Solletra, na llende los conceyos de Gráu, Candamu y Salas, facía pelligrar delles costruciones.

Esi ye precisamente l’incendiu mayor ya’l que concentra mayor númberu de medios, movilizando a 16 efeutivos de Bomberos d’Asturies a les órdenes del Xefe de Zona Centro, 12 operarios de tres empreses forestales y Guardería de Mediu Natural. Tamién tuvo  na fastera un de los helicópteros del SEPA, pero’l vientu, qu’algamó los 93 km/h, dificultó’l so trabayu; esta mañana dióse por estabilizáu, lo que quier dicir, non que te amatáu, sinon que ya nun representa un pelligru pa les costruciones urbanes nin se cuenta col so espardimientu.

El vientu desplica la rápida propagación, pero non l’orixe de les llames, que sigue siendo desconocíu; ocho de cada diez son demostradamente intencionaos.

Recientemente foron condergaos a sendes penes de dos años y mediu de cárcele dos ganaeros acusaos de prender un fuéu demientres la fola de quemes d’Avientu de 2015 en Parres, qu’amburó 428 hectarees, pero lo cierto ye que na gran mayoría de casos nun se da colos culpables.

Llucía F. Marqués, candidata d’Andecha Astur, acusó direutamente al “Principado” de “baillar la danza la lluvia pa frenar los incendios” pola so falta d’actuación ante un problema de tal gravedá y, lo mesmo que delles asociaciones d’ecoloxistes, desixe que s’investigue, non solo la culpabilidá, sinon l0s intereses ocultos tres d’estes quemes, a quién beneficien y porque se siguen consintiendo.

Redaición InfoAsturies