Les papeletes d’Andecha Astur que la Xunta Elleutoral ta facilitando pal votu por corréu tan mal guillotinaes, de manera que los nomes de los candidatos tan cortaos, lo que pue llevar a la invalidación de los votos

Foron los mesmos elleutores que solicitaren la documentación precisa pa poder exercer el so votu per corréu nos comicios del 26 de Mayu los qu’alertaron del defeutu nes papeletes de la formación nacionaliega: les mesmes apaecen cortaes llonxitudinalmente, partiendo a la metá los nomes de los candidatos -comu puede apreciase na semeya-.

“Ya nun saben comu llibrase de nosotros” declaró medio’n broma medio en serio la candidata de la formación, Llucía Fernández; nun ye pa menos: nel 2015 faltaben papeletes en dellos collexos y diéronse casos d’anulación de votos d’Andecha, por nun saber los presidentes de mesa que los votos n’asturianu yeren llegales. Nun yera’l primer problema: nel añu 2000 fore necesario una sentencia del Tribunal Supremu pa que se reconociere’l drechu de los asturianos a usar la so llingua nes comunicaciones elleutorales y nes papeletes.  Nestos caberos comicios la X.E. nun quiso recoyer un escritu d’Andecha por utilizar l’asturianu y un candidatu y apoderáu foi reteníu por pidir a un axente de la llei que cumpliere cola mesma y s’abstuviere de permanecer armáu dientro’l colexu elleutoral. Agora temen qu’esta nueva incidencia pueda ocasionayos pérdida de votos por anulación de papeletes incorreches.

Dende Andecha Astur reclamen a la X.E que se revisen les sos papeletes, retirando anantes del 26 Mayu aquelles que tean mal guillotinaes o tengan dalgún otru defeutu de forma, ya que amás de dar una mala imaxen de la organización, podría suponer que nes meses elleutorales consideren nulos esos votos, al nun ser claramente visibles los nomes de los candidatos.

Desixen tamién que la Xunta Elleutoral Central d’Asturies informe espresamente a toles meses elleutorales de que, en casu d’alcontrase nel escrutiniu papeletes d’ANDECHA ASTUR mal guillotinaes, tien de prevalecer la voluntá l’elleutor de votar a esa organización, considerando un defeutu ayenu a la so voluntá’l mal guillotináu -responsabilidá de la XE –  resultando válidos tolos votos d’estes carauterístiques.

Nuria Prendes

This work is licensed under a Creative Commons Attribution 4.0 International License.