Llucía Fernández, candidata d’Andecha Astur, denunció la ineficiencia del actual procedimientu de concesión de la Renta Social en Xixón, que’n 7 meses revisó les solicitúes de tres díes
A díi de güei siguen ensin resolver la mayoría de les solicitúes de Renta Social tramitaes en Payares y Avientu l’añu pasáu. Entá esta selmana espublizáronse nueves llistes, correspondientes a les solicitúes cursaes los díis 7 y 8 de Payares, ello ye, que d’Avientu a equí xestionáronse namás les correspondientes a los tres primeros de los 30 díis nos que se recoyó documentación pa solicitar esti serviciu social. La mayoría de los beneficiarios a los que ya se yos reconocío’l drechu entá nun recibieron fisicamente la tarxeta.
Andecha Astur recalca la prioridá ye crear puestos de trabayu non precarios que faigan innecesaries esta triba d’ayudes o que polo menos reduzan al mínimu el númberu de families que se ven forciaes a depender d’elles pa llevar una vida minimamente digna, pero entantu y non, la Renta Social tien de siguir vixente. “La tarxeta de la Renta Social ye un de los meyores proyeutos sociales puestos en marcha nel conceyu Xixón nos postreros años, apurriendo dignidá ya un nivel de vida meyor a miles de persones en situación de necesidá al tiempu que revitalizó’l comerciu llocal”. Poro, proponen qu’esti modelu s’esparda a otros conceyos asturianos.
Pa la candidata, que reconoz l’aciertu d’esta midía, ye imprescindible tomar midíes que garanticen tantu la continuidá d’esta aída como la so correuta xestión, axilizando los trámites cola asignación de más personal pa los mesmos y actuando d’oficiu nos casos nos que la situación familiar ya seya conocía “nun tien xacíu qu’una familia perceptora del salariu social o d’aides d’emerxencia tenga qu’entregar pa que seyan revisaos infinidá de documentos pa xustificar una situación que ya ta xustificada pola mesma percepción del salariu social”.
Tamién recalcó na necesidá d’evitar situaciones humillantes ya innecesaries, comu les hores de masificación que tuvieron llugar nos cientros de recoyida de documentos cuando se supo que s’entregaríen por orden de recepción en llugar de por orden de necesidá, cuestión esta a la que nun alcuentra llóxica “ye imprescindible priorizar en tou momentu a aquellos ciudadanos que s’atopen nuna situación más desfavorecía, non a los que primero enllenaron un documentu. Nesi sen, consideramos imprescindible dar prioridá a les families monomarentales/monoparentales, por ser estadísticamente les más afeutaes pola probitú”.
Soliciten tamién la eliminación del puntu 3.6 A, nel que se recueye como requisitu “que la UECI tenga unos ingresos iguales o superiores a la cuantía que figura nel siguiente cuadru” por considerar qu’unos ingresos demasiadamente baxos nun pue ser óbice pa recibir una aída destinada, precisamente, a aquellos en mayor riesgu d’esclusión ya insisten na necesidá d’exercer un terriu control pa evitar tanto la concesión inadecuao como’l so usu fraudulentu, sancionando nestos casos tantu al beneficiariu qu’incurrió en fraude como al establecimientu qu’actuó como cómpliz.
Nuria Prendes
This work is licensed under a Creative Commons Attribution 4.0 International License.
