Llucía Fernández, por Andecha Astur, y Pernando Barrena, por EH Bildu, desplicarán en Xixón el furrulamientu de la coallición Agora Repúbliques y comu esta va defender Asturies n’Europa y n’España
Nel actu políticu, que tendrá llugar na Antigua Escuela de Comerciu de Xixón allugada na cai Tomás y Valiente, güei de magar les siete y media la tardi, intervendrán l’hestóricu militante del movimientu nacionaliegu vascu y actual númberu tres na llista europea de la coallición Agora Repúbliques, Pernando Barrena, y la candidata a la presidencia d’Asturies por Andecha Astur, Llucía Fernández.
Nes sos declaraciones, Llucía Fernández recuerda que “La precursora d’esta formación, Los Pueblos Deciden, llevó al Parllamentu Européu temes tan importantes p’Asturies comu los fraudes d’El Musel y de los fondos mineros, la represión llingüística o l’escesu de contaminación ambiental“. Les caberes encuestes del CIS dan un mínimu de tres escaños a Agora Repúbliques, “colo qu’Andecha Astur garantiza al Pueblu Asturianu la so representación nel parllamentu européu ensin inxerencies españoles” al traviés de la so collaboración con otres formaciones soberanistes d’izquierdes presentes nel estáu y agrupaes na coallición, a la que tamién pertenecen ERC, EH Bildu, Puyalón, Ahora Canarias y BNG.
Redaición InfoAsturies
This work is licensed under a Creative Commons Attribution 4.0 International License.
