Les intervenciones cientráronse na necesidá de que los pueblos ensin estáu y les clases populares ten representaes n’Europa, lo inútil del “votu útil”, la incoherencia de los partios asturianos no que cinca a la llingua y la urxencia de la recostrución económica y social d’Asturies

“Ye l’intre d’Asturies y de los asturianos. Perriba’l votu útil, el del miéu o’l de les mentires, yo pídovos el votu de la coherencia. El de la xente que fae lo que diz y diz siempre lo mesmo. Y esi votu, n’Asturies, tien namás un nome: Andecha Astur, Agora Repúbliques”. – Llucía Fernández-

“N’Europa ye onde se deciden el 75% de les polítiques que los países apliquen ya en política, l’espaciu que se dexa vacíu vien otru a ocupalu” -Pernando Barrena-

Na tardi d’ayeri tuvo llugar un mitin d’Agora Repúbliques-Andecha Astur enartáu na campaña elleutoral europea d’esta coallición qu’agrupa a cincu partios soberanistes d’izquierdes. Nelli, tres d’una intervención musical, intervinieron la candidata d’Andecha Astur, Llucia Fernández, y Pernando Barrena, candidatu por Agora Repúbliques y futuru eurodiputáu, ya que ye terceru na llista de la coallición y cuenten conseguir pente tres y cuatro representantes europeos.

“Tenemos voz n’Europa y los asturianos tamién la tienen, gracies a Andecha Astur” Recalcó Pernando, repasando la llarga llista d’intervenciones d’Andecha Astur nel gobiernu Européu y español al travies de Los Pueblos deciden, agrupación precursora d’Agora Repúbliques. Na so intervención tamién insistió na necesidá de dar a les elleiciones europees la importancia que merecen “N’Europa ye onde se deciden el 75% de les polítiques que los países apliquen ya en política, l’espaciu que se dexa vacíu vien otru a ocupalu”. Por ello pidió el votu pa Europa, pesi a que les encuestes amuesen el pocu ciñu qu’esta istitución xenera en bona parte de la población “Dinero pa los bancos y polítiques d’austeridá, nun esperen que te aplaudan” insistió, pidiendo a los organismos europeos qu’asuman la responsabilidá sobre les consecuencies de les sos polítiques.

Nesi sen Llucía Fernández declaró que “Reconocemos que’l modelu de Xunión Europea vixente, encadarmáu por y pa caltener los privilexos del gran capital, nun ye’l nuesu. Pero sí tamos dimpuestos a collaborar con cuantes fuercies polítiques europees apuesten por convertir, dende fora y dende dientru, esa Xunión Europea nun nueu modelu de rellaciones internacionales afayáu a los intereses de les clases populares y de les naciones d’Europa”.

En cuantes a política asturiana, Llucía criticó duramente’l votu útil ya’l posturéu de quienes dicen defender l’asturianu pero nun lu utilicen nin nes sos comunicaciones internes nin esternes, nin nel so programa, nin nes sos papeletes, remembrando que namás se puede votar n’asturianu a Andecha Astur.

“Pero cuando se costruye un país, nun ye solo la llingua lo qu’hai que defender” añadió, aludiendo al ampliu programa col que Andecha Astur se presenta a estos comicios “Defendemos la reactivación de tolos seutores productivos -tradicionales y non- y vamos convertir esti país, que nunca me cansaré de dicilo, tien bayura pa ello, nun llugar nel que podamos quedanos a vivir y al que puedan volver los que se vieron forciaos a colar” una llabor llarga que, reconoció, ta entamando y necesita de la collaboración de los asturianos “Tamos echando los cimientos d’una república firme y bien afitada, pasiquín a pasu, malpenes entamen a vese les parees y los teyaos nun pueden ponese, porque los teyaos nun se ponen nel aire. Queda muncho por trabayar, pero pa cuando finemos tendremos un país que podamos llamar nuesu”.

L’actu presllóse cola interpretación a vigulín de la Flor del Agua.

Nuria Prendes

This work is licensed under a Creative Commons Attribution 4.0 International License.