Dellos representantes de colleutivos asturianistes y soberanistes roblen un alcuerdu con Andecha Astur pa trabayar en comuña pola reconocencia de la soberanía d’Asturies y los drechos sociales y políticos del Pueblu Asturianu. El pautu ta abiertu a persones y organizaciones que compartan estos enfotos

“El díi que los asturianos nos xunamos nun va haber sucursal madrilana que mos apare nel nuesu enfotu de llevantar Asturies” –Llucía Fernández, candidata d’Andecha Astur

La difícil situación sociopolítico na que s’alcuentra Asturies anguañu llevó a la formación política a caltener aconceyamientos con representantes d’estremaos colleutivos del soberanismu/asturianismu colos que comparten enfotos.  D’ellos ñació’l compromisu d’afitar un  frente ampliu, de puntos mínimos, “qu’ufra a les asturianes y asturianos una opción política que trabaye con determín pola reconocencia de la soberanía d’Asturies y los drechos sociales y políticos de la so ciudadanía”, trabayando en comuña pa rentabilizar la representación político que la coallición “Agora Repúbliques”, de la que forma parte Andecha Astur, algamó nel Congresu y nel Senáu españoles y la que va algamar darréu nel Parllamentu Européu, onde cuenten con algamar 3 o 4 escaños.

Fasta agora roblen el manifiestu, amás del Secretariu Xeneral D’Andecha Astur, Paulo Arboleya y la so candidata a la Xunta Xeneral, Llucía Fernández, miembros de CNA, ENA, PAs, asina comu dellos asturianistes independientes, que faen estensible’l mesmu a les presones y/o organizaciones que compartan los principios de soberanía política asturiana y defensa de los drechos individuales y colleutivos que conformen esti frente ampliu.

Nuria Prendes

This work is licensed under a Creative Commons Attribution 4.0 International License.