La corrupción y los preslles nun pasen factura al PSOE, Podemos desploma y Andecha Astur duplica n’Europa los resultaos de los comicios estatales

Pocu más de mediu millón d’habitantes (535.876) votaron ayeri nuna xornada na que les úniques incidencies foron les interrupciones causaes pola falta de papeletes d’Andecha Astur y de PACMA en dellos colexos elleutorales d’estremaos conceyos -Llanera, Lluancu, Avilés, Xixón, Piloña…-

Los asturianos decidieron ayeri qu’Asturies siga en manes de quienes la llevaron onde ta. El Casu Marea, el casu Hulla, el casu de los cursos d’UGT, el casu El Musel, el casu Pokemon, el GITPA… los gastos en “putas y varios”, los preslles mineros ya industriales, el ca vegada más rápidu desaniciu y despoblación… tou ello nun pasó factura nes furnies, gracies a l’ausencia de  denuncia y fiscalización de la corrupción y del collaboracionismu de partiós que non solo nun denunciaron los fraudes, sinon que pautaron colos corruptos ya’l blanquiamientu de la corrupción por parte de tola izquierda española.

El resultáu  -comu, pero otru lláu, ya s’esperaba- torna a poner a un partíu más español que socialista na abegosa tesitura d’escoyer con quien pautar ¿sumarán +4 con Podemos o +5 con C’s? ¿Quién tará dimpuestu a renunciar a qué?. Nun escaezamos la emportancia de la entrada de la España más radical nel gobiernu d’Asturies : Vox algama dos representantes.

A nivel Européu, la noticia más emportante ye la triple representación direuta d’Asturies algamada gracies a la participación d’Andecha Astur n’Agora Repúbliques; dende la organización comuniquen que güei mesmo ya entamaron los contautos col europarlamentariu Pernando Barrena pa poner en marcha les primeres aniciatives “dende anantes de les elleiciones ya sabiemos que lo importante venía depués del 26 y tabemos llistos pa retomar el trabayu con puxu” declaró Llucía Fernández, candidata de la organización nestos comicios.

Nuria Prendes

This work is licensed under a Creative Commons Attribution 4.0 International License.