Acordies la memoria presentada pola Fundación Municipal de Servicios Sociales, de les 199 persones que solicitaron esta ayuda, 57 nun la recibieron. Cinco de les solicitudes aprebaes yeren pa casos de mui estrema necesidá, ello ye, en situación de riesgu d’inanición. Les otres 137 entá nun algamaben esi puntu, pero precisaben les perres pa vivienda, suministros o inclusu pagos funerarios. Los barrios más afeutaos son El Llano y Xixón Sur, siendo l’Arena el que que menos solicitues rexistró y la zona cientru la que mayor xorrecimientu relativu esperimentó.

El 40’4% de les families que reciben aides municipales nun tienen dalu ingresu mensual ya otru 17’44% entren menos de 400 euros al mes. Les persones en situación de necesitar ayudes son principalmente muyeres (el 71%), medrando el porcentaxe de mocedá y persones con estudios, siendo les families biparentales el modelu que menos les solicita.

El perfil ye bien estremáu qu’el de la Rede d’Inclusión Activa de Xixón (Asociación xixonesa de Caridá, Cáritas, Fundación Siloé, Mar de Niebla y Albergue de Covadonga) qu’apurre principalmente servicios de comedor y un llugar onde durmir y qu’atiende a otres 5.545 persones, mayoritariamente varones non asturianos (70,8% españoles inmigraos), solteros ya ensin cargues familiares. Ye de destacar qu’un 10% d’ellos cuenten con estudios universitarios.

Pesi a esta situación na que vive bona parte de la población xixonesa, el gastu municipal total n’ayudes d’emerxencia ya integración foi de 50.000 euros menos que nel añu anterior.

Llucía F. Marqués

This work is licensed under a Creative Commons Attribution 4.0 International License.