La dirección de Saint-Gobain dió avisu al Principado del preslle de la planta d’Avilés unos díes anantes de les elleiciones: nun aniciu diba ser un procesu escalonáu a lo llargo’l 2020, pero finalmente decidieron presllar de manera definitiva y treslladar la so produción a la fábrica de Kenitra, en Marruecos, esti mesmu añu.  Nos prósimos meses prexubilaráse a los trabayaores de más edá, nun se renovarán los contratos eventuales y de magar setiembre, el preslle  de la planta sedrá definitivu.

Los trabayaores llevaben tiempu viéndolo venir, ante la continua deriva de trabayu a empreses esternes y subcontrates y la non convocatoria de places vacantes, lo que, xunto colos continuos incumplimientos de los alcuerdos, el conveniu coleutivu y l’estatutu trabayaores, los llevare a entamar el pasáu mes de febreru un ampliu calendariu de movilizaciones, qu’aparentemente nun dieron el resultáu esperáu.

Marruecos ye un destín ca vegada más naguáu pa les empreses, pola so normativa relaxao en cuestiones sociales y mediu ambientales, que permiten a les industries evitar les desixencies europees calteniendo a un tiempu la cercanía al mercáu continental.

Llucía F. Marqués