El primer informe del impautu económicu de la llingua valenciana apurre datos impresionantes que confirmen que la llingua propia ye una riqueza que va más allá de lo cultural, una oportunidá económica y de creación de trabayu esbardiada n’Asturies pola falta d’Oficialidá y enfotu

Un informe asemeyáu sobre l’euskera recueye qu’esa llingua apurre 2.800 euros de beneficiu al Pais Vascu

L’estudiu Impautu y valir económicu del valencianu encargáu pola Conselleria de Educación al Istitutu Valencianu d’Investigaciones Económiques (IVIE) aporta a la conclusión de que’l tres por cientu del emplegu na Comunidá Valenciana ya’l 2’1% del so PIB dependen de la so llingua. Esto traduzse en 56.367 emplegos y 2.065 millones d’euros xeneraos por actividaes direuta ya indireutamente por actividaes relacionaes col valencianu.

En concretu esti estudiu identifica cuatro grandes estayes económiques que xeneren riqueza económica de magar cuestiones llingüístiques. La primera, con un impautu del 90’8% del importe económicu ya’l 87’3% del emplegu, ye la industria de la llingua, ello ye, la ensiñanza del valencianu, tanto pública comu privada y los servicios de torna y asesoría llingüística. cultura y medios de comunicación, educación y  espardimientu.

Darréu, la cultura y los medios de comunicación (llibreríes, editoriales, discográfiques, produción audiovisual, prensa, radio y televisión), responsable de xenerar direutamente 133,6 millones d’euros  y 5.987 puestos de trabayu.

Un 2’8% de la renta ye d’orixen públicu y correspuende a les actividaes venceyaes al ámbetu educativu -de reciella a universitariu-, con un 1’4% del emplegu y a los servicios pal espardimientu y conocimientu del valencianu que s’apurren dende les alministraciones públiques, con un 0’8% de los puestos de trabayu.

L’estudiu tien en cuenta los datos del añu 2017, incluyendo estadístiques oficiales, información de presupuestos públicos, bases de datos empresariales y los apurrios por 400 visites de campu a empreses del sector priváu. Estos datos son anteriores a los cambios nel escenariu xeneraos pola reapertura de À Punt, la radio y televisión pública valenciana, que los sos reditos nun tan incluyios nos resultaos.

This work is licensed under a Creative Commons Attribution 4.0 International License.