La habitación propia, única llibrería n’Asturies dedicada a la lliteratura escrita por muyeres foi l’escenariu nel que se tornó a presentar esta imprescindible obra “porque hai nuevu públicu interesao en lliteratura escrita por muyeres, porque siempre ye afayadizo trayer versos a los nuesos oyíos, porque en tiempos convulsos la poesía ye necesario”

L’antoloxía Poética de Muyeres 2014, proyeutu del Grupu Epona, con Helena Trexu al frente, vió la lluz va 5 años, pero la idega que lu impulsó sigui siendo un conceutu vixente dafechu: visibilizar la poesía escrito por muyeres asturianes d’estremaes xeneraciones, cola llingua de nueso como filu conductor, un finxu contra la minorización tanto llingüística comu de xéneru. Foi por ello que se decidió repetir la so presentación, col envís de facer aportar el so mensaxe a les moces que yeren entá neñes cuando s’espublizó y qu’agora tan en condiciones de procesalu y, quiciás animaes poles pallabres d’estes poetes, garrar el testigu.

Pa ello aconceyaron ayeri delles de les autores del llibru, nun escenariu que nun podía ser más afayaizu pa la cuestión: la llibrería feminista “La Habitación Propia”. Marta Morí, Paz García, Txiki Llope, Llucía Fernández y por supuestu, Helena Trexo Fombella, tornaron a poner voz a los sos poemes recoyios en llibru y a los de dalgunes de les autores ausentes.

La sospresa aportó cuando una de les participantes, Paz Fernández, recitó un poema inéditu de so, lo qu’abrió la puerte a la llectura de nueves obres por parte de les autores, teniendo asina les asistentes el privilexu de sentir en primicia los poemes más recientes de dalgunes de les poetes más representatives del escenariu lliterariu asturianu.

De magar el recital, l’actu allargóse nun perinteresante alderique nel que feminismu, oficialidá, educación y futuru s’entetexeron pa debuxar l’escenariu nel que se mueve la poesía escrita por asturianes.

Redaición InfoAsturies

This work is licensed under a Creative Commons Attribution 4.0 International License.