Sigún denuncia el partíu, los mélicos asturianos son los que más se ven forciaos a emigrar en busca de trabayu de tol estáu “Lo que falten nun son mélicos, son contrataciones”

Ante les recientes declaraciones del SESPA, que llegó a falar d’adoición de midides “esceicionales” y de “falta de mélicos acuciante” n’Asturies, Andecha Astur remembra que la mayoría de los titulaos en melecina na Universidá d’Uviéu vense obligaos a colar del país por falta de contrataciones. “N’Asturies nun hai falta de mélicos, lo que nun hai son contrataciones del SESPA, aparte de tener la Facultá de Melecina infrautilizada y les places MIR llendaes a niveles ínfimos.” declaró Llucía Fernández, remembrando que non solo los qu’algamen la titulación de melecina nun alcuentren trabayu n’Asturies, sinon que les places que s’ufierten na Universidá d’Uviéu y, sobro tou, nel MIR son escasísimes.

Esti añu p’algamar una de les 153 places na Facultá de Melecina ye preciso pasar una nota de corte de 12’45, siendo amás la so matrícula de les más cares de les ufiertaes -1289 €-. D’estos 153 matriculaos, menos de la metá, 70 l’añu pasáu, podrán optar a una plaza MIR, que tampocu yos garantizará la permanencia n’Asturies.

Sicasí, el SESPA continua alegando “falta de facultativos” pa xustificar la desatención sanitaria y la falta de cobertura mélica en delles poblaciones, defendiendo la puesta en marcha de midides esceicionales, con consecuencies que probablemente recaigan nos mélicos y pacientes, pero ensin plantegase la tan urxente ampliación de la plantiya mélica asturiana.

Nuria Prendes

This work is licensed under a Creative Commons Attribution 4.0 International License.