La necesidá de camudar los vezos de produción y consumu d’enerxía y alimentos cientró una xornada entamá poles asociaciones del barriu Ventanielles en comuña col Conceyu d’Uviéu, na que s’amosaron delles esperiencies asturianes nesi sen
Baxo la moderación d’Alba Nogueiro, de Soldepaz-Pachakuti, participaron nel alderique representantes de la cooperativa financiera Coop 57Asturies, que posibilita créditos pa proyeutos de la economía social y solidaria, que se ve na estraña coyuntura de que-y sobren les perres, al haber nesti intre más aforraores concenxaos que proyeutos a la gueta de financiación, 
AstuEnerxia, grupu asturianu qu’ufre la posibilidá de camudar l’usu de les enerxies, al traviés de cooperatives de produción llimpia que s’enfrenten al monopoliu enerxéticu, miembros del Grupu de Consumu del Llocal Social Cambalache, qu’ufre n’Uviéu la posibilidá de compartir Grupu de Consumu pa productos provinientes d’agricultores o grupos de produción conocios, ya Irene García Roces, doctora en feminismu-y-agroecoloxía, que faló de la obligación comprometía de xenerar modelos de produción y formes organizatives fuertes pa desendolcalos y de la necesidá de movilizaciones ante istancies internacionales pa oponese a la OMC-FM-BM, apurriendo amás una güeyada feminista porque “la soberanía alimentaria tien nome de muyer”, y porque la agroecoloxía ensin equidá ya ensin propuesta feminista nun tendría xacíu.
De lo llocal a lo global, toes estes esperiencies asturianes enllacen con otros movimientos asturianos, estatales, europeos y mundiales, comu ye’l casu de la Via Campesina, qu’acuñare’n términu “Soberanía Alimentaria”, agora es
pardíu perdayuri, siendo tamién unos de los mayores impulsores de l’Agroecoloxía pente los sos millones d’afiliaos.
Demientres l’alderique vióse la necesidá d’un mayor espardimientu pa que munchos proyeutos personales, coleutivos y llocales vaigan camudando comportamientos de manera que pueda curiase meyor el planeta, ya que munches vegaes la intención esiste y la posibilidá tamién, pero falta’l conocimientu.
El viniente domingu 30 Xunu nel Pueblu d´Asturies en Xixón, tendrá llugar una folixa, onde los Drechos del campesináu, aprebaos pola ONU n’Avientu ante’l silenciu de los medios, sedrán los protagonietes.
Llucía F. Marqués
This work is licensed under a Creative Commons Attribution 4.0 International License.
El cartelu que vien col artículu diz que la folixa campesina ye’l 30 de xunu. Albidro que la fecha nel cuerpu l’artículu (30 de xunetu) ye un error de déu.
Un saludu