Según los resultaos apurríos pola Encuesta de Condiciones de Vida correspondiente a 2018, publicada ayeri pol INE, el porcentaxe de población en riesgu de probitú o esclusión social en Asturies xubió al 20,89%, más de dos puntos percima la cifra del 2017 – 18,5%-
Ye respigante’l simple fechu de qu’asumamos como normal la esistencia d’una bolsa de probitú, como si fuere inevitable qu’un porcentaxe de la población asturiana subsista na miseria, escareciendo de los medios básicos pa llevar una vida minimamente digna. Pero non solo ye qu’esta bolsa esista y que lo aceutemos, sinón que medra, añal, de cutio. Si l’añu pasáu dicíamos qu’en ca clas había cuasi 4 neños con series dificultaes pa llevar una vida digna, esti tenemos que paranos a pensar que son siquier cinco los que van tener dificultaes pa llevar merienda a clas tolos dies, nun digamos yá pa mercar el material escolar o pagar escursiones. En branu nun tendrán siquier la seguridá de facer una bona comida al díe, al presllar los comedores escolares.
Porque amás esta probeza cébase bien especialmente colos menores, siendo les families monomarentales xuntu coles persones mayores de 65 años les qu’en peor situación económica s’atopen, según reflexen les encuestes.
Imposible nun xunir mentalmente esta noticia cola qu’espublizábamos ayeri sobre les prioridaes nos conceyos y les xubíes salariales a los ediles.
Llucía F. Marqués
This work is licensed under a Creative Commons Attribution 4.0 International License.
