Abren nueve cientros pa mayores y presllen doce escueles, un recuentu que val pa resumir la situación demográfica d’emerxencia a la nos tan llevando les polítiques de les caberes décades

Nun ye namás que perdieremos cerca de 6.000 asturianos el caberu añu, 63.000 nuna década, nin que nos averemos pelligrosamente a la llende del millon d’habitantes -qu’acordies el SADEI algamaremos pal 2023- con cifres que nun s’algamaben dende la posguerra; la vraera traxedia ta nel avieyamientu.

Si anguañu’l númberu de mayores de 60 años triplica llargamente el de menores de 15, pa dientro una década, casu de cumplise les previsiones de la Sociedá Asturiana d’Estudios Económicos ya Industriales, cuadriplicaríala.

La mayor esperanza de vida xúnese a la baxa natalidá pa ufrir datos respigantes, comu que pal 2029 habrá tantos mayores de 90 años comu reciella de menos de cuatro.

Resumiendo, la población con necesidaes xeriátriques medra esponencialmente, demientres que la que tien necesidaes educatives amenorga. Esto podría derivar, con polítiques d’otra triba, nuna ablucante meyora del sistema educativu, calteniendo la inversión con menos escolinos, pero de fechu ye a la contra, ya que la opción del “Principado” ye presllar colexos y forciar tresllados, especialmente na fastera rural, la más afeutada pol avieyamientu y la despoblación.

Doce escueles menos xustificaes por un descensu d’alrodiu los 4.000 escolinos y nueve xeriátricos que recueyen, non solo l’espoxigue de la población de mayor edá, sinon l’efeutu de la emigración de les xeneraciones intermedies, que ruempe la convivencia familiar ya’l curiáu de les persones mayores por parte de los sos fios y ñetos.

Llucía F. Marqués

This work is licensed under a Creative Commons Attribution 4.0 International License.