Andecha Astur denuncia la utilización elleutoralista del asturianu fecha nos pasaos comicios y reclama’l modelu de Bimenes comu camín a siguir ya exemplu de coherencia ya enfotu, llamando a participar na folixa pola Oficialidá d’esti fin de selmana

“Esti 6 de xunetu hai que tar en Bimenes, pa dexar nidio que yá ta bien d’enredar y sacar réditos políticos colo que ye un drechu inegociable del conxuntu del Pueblu Asturianu, pa desixir drechos y denunciar posturéu, pa dar otru reblagu más na Oficialidá de la nuesa llingua nacional”

Bimenes declaró por primer vegada la Oficialidá de la llingua asturiana’l 5 Xunetu del 1997. De magar entós, pesi a les “invalidaciones” y les vueltes atrás por “falta de competencies” la voluntá soberana del pueblu Bimenes, con Aitor García al frente, caltién una oficialidá de fechu en conceyu.

Venti años de llingua oficial intermitente ya nun hebio altercaos, dengún español falante foi agredíu nin denguneáu, nun hai quexes por imposición nin discriminación, denguna empresa abandonó’l conceyu por cuestiones llingüístiques, el caos nun arrasó Bimenes. De fechu falamos d’un de los conceyos asturianos con menor delda pública ya un de los más vivos de les fasteres rurales.

La entruga ye, si nun hai torga rial pa facelo, si Bimenes puede y los yerbatos ven reconocios los sos drechos llingüísticos … ¿porqué non nel restu d’Asturies? ¿Porqué nos conceyos nos que Podemos, IU ya incluso’l PSOE, partíos teóricamente favoratibles a la oficialidá, tienen mayoría, nun se fae lo mesmo? ¿Porqué n’otros llaos queda tou en declaración d’intenciones y normatives raramente aplicaes? ¿Porqué nin siquier la toponimia oficial ye respetada, contraviniendo’l propiu marcu llegal? ¿Nun sedrá qu’en realidá nun tan tan enfotaos comu dieron a entender pa les elleiciones? ¿Nun sedrá qu’hai muncha semeya pa la galería y mui poques ganes de salvar la llingua asturiana?.

Llucía F. Marqués

This work is licensed under a Creative Commons Attribution 4.0 International License.