Seique con Eilao son ya 65 los conceyos que tienen aprebada la toponimia propia, l’aplicación real de los nomes oficiales, tantu en señalización vial comu en prensa y documentos va mui per detrás de lo esperao
El Gobiernu d’Asturies avanza nel mapa toponímicu cola aprebación del decretu que determina los topónimos oficiales d’Eilao, colo que son ya 65 los conceyos asturianos con toponimia tradicional oficial.
Amás, tán en fase mui avanzada los espedientes toponímicos de los conceyos Cabrales, Llanera, Castropol y Somiéu, mentes que los de Cuideiru, Ayande, Caravia, Ibias, Peñamellera, Salas, Navia y Pravia van más retrasaos nel procesu.
Cola aprobación de la Llei de Promoción y Usu del Bable/Asturianu, nel añu 1998, afitóse la necesidá de recuperar los topónimos tradicionales del país, españolizaos en bona parte. La creación nel 2004 de la Xunta Asesora de Toponimia abrió un procesu nel que los conceyos solicitaben la revisión de la so toponimia pa dar el pasu d’oficializar la tradicional, y en mayu del 2005 espublizáronse nel Boletín Oficial del Principáu d’Asturies los primeros decretos de oficialización toponímica, correspondientes a los conceyos d’El Franco, Carreño y Llanes.
La oficialización de los topónimos del país implica la derogación automática de los españolizaos, pasando a ser los asturianos los únicos llegalmente válidos, daqué que’n munchos casos ta quedando en papel moyao, siendo asina que les propies alministraciones continuen utilizando de manera illegal los topónimos non oficiales.
Llucía F. Marqués
This work is licensed under a Creative Commons Attribution 4.0 International License.
