Conceyu Abiertu por Noreña nun sofita la propuesta de sueldos del gobiernu municipal y echa-yos en cara la falta d’hixene democrático que supón treslladar competencies fasta agora del plenu municipal a la Xunta de Gobiernu Llocal
Conceyu Abiertu por Noreña, a la vista de la propuesta d’alcaldía de lliberaciones, declara nun entender como inda cuando l’equipu de gobiernu aumenta de númberu y les perres dedicaes a lliberaciones aumenten cuasi un 80% por hora al respeutu de los postreros 4 años, el tiempu de dedicación en conxuntu amenorga, ello ye, va haber menos hores de dedicación por parte’l gobiernu pero muncho meyor pagaes.
Faciéndo númberos, propónse un gastu añal brutu -al qu’habría de sumar el gastu de la Seguridá Social y otros- por una dedicacion mensual de 432 hores, cuando na cabera llexisllatura ascendía a namás 36.000 por una dedicación mensual de 480 hores, ello ye, proponen subir el sueldu 21.300 € añales, perdiendo 144 hores.
Per otru lláu, no que cinca a la Xunta de Gobiernu Llocal, llamenten que nun s’incluyere a otru grupu políticu de la oposición, lo que s’agrava cola propuesta de l’alcaldía de treslladar abondes competencies del Plenu, onde tolos grupos tan representaos, a la Xunta de Gobiernu, na que namás tarien ellos, arrampuñando asina competencies al restu de partios na toma de decisiones.
Les competencies que perdería’l Plenu municipal, d’aprebase la propuesta d’alcaldía, incluin cuestiones d’emportancia, comu la toma de decisiones sobro precios públicos, xestión de servicios, aprebación de proyeutos d’obres y servicios non presupuestaos, reconocencies estraxudiciales de delda, autorización de compatibilidaes, alquisiciones de bienes y transaciones, cesiones de baldre a istituciones privaes, aprebación de condiciones de contratación, concesión d’honores y distinciones y un llargu etcétera.
Nuria Prendes
This work is licensed under a Creative Commons Attribution 4.0 International License.
