Una entrada cómica de María, conceyala de Bimenes, asonsañando’l babayismu antiasturianu, una prestosa intervención del alcalde de la Oficialidá, Aitor Bimenes, unes pallabres d’un paisano que falaba comu si viniere d’al par del Nalón pero que venía dende Miranda ya’l sentíu pregón de Maria Cotiello, actriz y activista llingüística que depués de respigar a los presentes col so emotivu discursu remató cola frase de Xuan Bello “Podriemos ser felices ensin ser, pero escoyemos ser”… asina entamaba una folixa pola Oficialidá marcada pola presencia de dalgunos que nun son pero taben y la falta de munchos que nun taben pero son
Bimenes, un pueblu que ye la envidia de munchos asturianos, cellebraba güei la folixa que ca añu remembra’l fechu hestóricu que los estrema del restu d’Asturies: allí la llingua de nueso ye, dende va cerca un cuartu sieglu, oficial, de fechu ya ensin medies pallabres.
A les doce’l mediudíe, baxo un sol de xusticia, la música de la Banda Gaites y les pandereteres de Bimenes abrieron l’actu. La intervención cómica de Maria Menéndez dio la entrada a Aitor García y fizo sonrir a toos asonsañando les frases que tantu tenemos qu’aguantar d’ignorantes y faltosos. L’alcalde criticó na so intervención a la clas política, declarando que “Nin too val nin toos valen. Sientense llexitimaos pa decir lo que podemos falar y lo que non, cualisquier iluminau ta capacitau pa discriminar y son ellos los que quieren imponer les normes de quienes son ciudadanos de primera y de segunda”. Darréu, un saludu dende Miranda ya’l prestosu pregón de María Cotiello, que cuntó la esperiencia de ser asturianista dende un puntu de vista mui personal y direutu, poniendo’l intre emotivu al actu. “Los asturianos tenemos qu’enfrentamos a mentires, disprecios, menosprecios ya insultos qu’anguañu consiguen grandes titulares en medios de comunicación… torgar una mentira ye muncho más dificil que decila y sabeis, sabemos que ye esgotador y ridículo’l tener que defendese de continuo”.
L’Himnu nacional a cargu de la banda gaites, l’actuación de los paliteiros mirandeses y la Danza pola Oficialidá, na que participaron bona parte de los presentes, punxeron el preslle al actu oficial anantes de cruzar al prau pa continuar la folixa con una romería.
This work is licensed under a Creative Commons Attribution 4.0 International License.
