Depués de Falcon Crest, nos viñedos californianos, de Gran Reserva na Rioxa, el penedés catalán espeyáu en Nissaga de poder, Buina Stagione nos viñedos italianos, Plonk n’Australia o Kamino Shizuku (Pingarates de Dios) en Xapón, por fin la sidre tien la so comedia

Tres d’once meses trunfando nel Teatro Lara de Madrid, onde s’estrenó, presllen temporada pa venir a Xixón. La primer actuación d’esta obra asturiana del autor xixonés JuanMa Pina sedrá nel Teatru Xovellanos esti vienres 12 de Xunetu a les 20:30

De magar el so estrenu, en Setiembre del 2018, Sidra en Vena vien llevando ca vienres al teatro madrilanu la so hestoria de sidre y enriedu: La familia Pomarada -dueños de Sidre Pomarada, el llagar más importante del oriente asturianu- decide celebrar la nueche de San Xuan na so casa de Ribesella. El patriarca convida a los sos 3 caprichosos fios, que vendrán dende Uviéu acompangaos de marios, amantes y tasistes. Toos ellos asistirán cola fin de vengase y presllar asina’l pior iviernu de les sos vides. Una nueche onde sangre y sidre cuerren a partes iguales. Cachopos envelenaos, gaites rotes, orbayu de siguío y la Virxen de Cuadonga ausente.

Una obra de Juanma Pina, cola direición d’esti en comuña con Juan Camblor, protagonizada por Dolly, Sergio Campoy, Olga Hueso, Raquel guerrero y  Mario Alberto Díez y cola música de Rodrigo Cuevas, Sidra en Vena defínese  comu “una comedia que mez el vodevil coles series televisives, los xiros inesperaos coles infidelidaes, les pasiones, las sospeches y les vengances de doce personaxes interpretaos por cinco actores. Sidra en Vena ye Berlanga, ye Dinastia, un Falcon Crest del mundiu de la sidre, ye fabada  nuna llata de Campbell’s”.

Redaición InfoAsturies

This work is licensed under a Creative Commons Attribution 4.0 International License.