Castañón, cola so sidre Val de Boides, ganó por tercer vegada el Premiu a la Meyor Sidre d’Asturies, Orizón recibió’l reconocimientu comu meyor sidre naveta y Marcos Ramo foi el campión d’un reñidísimu Concursu d’Echadores
Si Nava ye siempres sinónimu de bona sidre, na selmana del Festival muncho más: siete díes dedicaos a beber y vivir la sidre. De magar el martes 9 de Xunetu y fasta güei mesmo, la sidre tuvo na cai con concursos, tasties, alderiques y muncha música.
Pa la mayoría de los asistentes lo más prestoso son les degustaciones de sidre y productos gastronómicos na cai y los más folixeros esperaben con gana l’apertura de les 8 pipes que regalaron más de 5.000 llitros na nueche del sábadu, pero lo que tenía en vilu a los sidreros más auténticos yeren los resultaos de los concursos. Los premios de Nava son los más prestixosos, xunto colos de Villaviciosa, y los más completos, escoyendo non solo la Meyor Sidre d’Asturies y de Nava, sinon premiando tamién a toles Meyores Sidres y Derivaos de la Manzana Ellaboraos n’Asturies, tornándose escaparate del ampliu abanicu de productos de calidá presentes nel mercáu de la sidre.
Esti añu la Meyor Sidre d’Asturies tornó a ser la del llagar Castañón (Quintueles) qu’algamó cola so sidre D.O. Val de Boides el primer puestu por tercer añu consecutivu, un fechu inéditu na hestoria del Festival. Esti llagar tien tamién, por segundu añu, el premiu al meyor aperitivu col so Roxmut. El segundu puestu foi pa Sidre La Nozala y, tres d’un axustáu desempate, la Tercer Meyor Sidre d’Asturies quedó en Xixón, cola sidre del llagar de Contrueces.
Los otros premiaos foron Españar comu meyor sidre peñerao, Valverán 20 Manzanas la Meyor sidre de Xelu, Riestra, Meyor Sidre Esóxeno, M.Norniella, llevó el premiu a la Meyor Sidre Endóxeno, la vinagre xixonesa Camín, reconociose la Meyor Vinagre, el Gaitero llevó’l premiu a Meyor Sidre formatu de terciu, Salvador del Obispo repitió primer puestu comu Meyor Aguardiente y Pomar Rosé la Meyor sidre Rosao. El Llagar Viuda de Angelón recibió amás el premiu a La Etiqueta más Guapina.
Nel concursu d’Echadores cellebráu el domingu -otru de los momentos cumes del Festival- la victoria foi pa un arguyosísimu Marcos Ramos, de la Sidrería La Ballera, en Villaviciosa. El premiu, dotáu con 500€ más troféu, cuenta 20 puntos pal Campionatu Nacional d’Echaores de Sidre.
Esti Festival, el que más solera tien del so xéneru, lleva cellebrándose de magar l’añu 1969, seique ta na so 42 edición, ya qu’al entamu yera un certame biañal.
Redaición InfoAsturies
This work is licensed under a Creative Commons Attribution 4.0 International License.
