Ca añu son más les voces que s’alcen contra l’aberrante espeutáculu d’autobombu militarista col que tolos branos l’exércitu español fae gala de la so potencia bélica nel cielu de Xixón
El Festival Aéreu Internacional traerá otra vegada a Xixón decenes de máquines de guerra coles que tratarán d’amosar la cara “amable” d’unos artefautos diseñaos pa matar eficientemente, guiaos por persones que dediquen la so vida precisamente a eso.
Pa facer entá más macabru l’actu y más bultable la menacia, esti actu cellébrase siempres nel cabudañu del entamu del bombardéu de Xixón -y otres ciudaes asturianes- por parte de los exércitos español y alemán, nel añu 1937, cuando 15 meses de bombardeos por mar y aire dexaron miles de muertos civiles.
Ensin dubia, miles d’espeutadores mirarán pal cielu ensin plantegase la correción moral o la llectura política que tien emocionase con aparatos de matar, pero ca añu son más los xixoneses que se decaten del conteníu belicista y españolista, del gastu inxustificáu y de la contaminación -acústica y atmosférica- que conlleva esta demostración de fuercia, y pali que pali más coleutivos van sumándose a la demanda d’otra triba d’arruelu que nun tenga que ver cola muerte.
Llucía F. Marqués
This work is licensed under a Creative Commons Attribution 4.0 International License.
