Si lo llamaren “maniobres militares del exércitu invasor sobro zona urbana” sonaría mui feo y taría prohibío. Habría manifestaciones y la población civil, pente cabreada y acoyonada empresllaríase’n casa coles persianes baxaes. Comu lo llamen “Festival Aéreo”, la mesma población apetugúñase na playa a ver pasar los aviones
El mio fiu esconsoña güei ya entruga si podemos colar de Xixón: nun quier sentir los aviones. La mio vecina, Amila, presllará les persianes y empresllaráse’n casa cola familia: fuxen d’otros bombarderos y sentir estos -llevamos tres díes careciéndolo- esconsoña imaxes de desaniciu y muerte que quieren escaecer. Los supervivientes del bombardéu a Xixón nel 1937 aprieten los puños con noxu ya incredulidá repetía: sí, son los mesmos aviones, el mesmu exércitu, la mesma bandera que quixo matalos.
82 años esautos dende’l primer vuelu militar del exercitu español perriba Xixón y siguin sobreesnalando la sablera. Nun falten dengún añu a cellebrar l’aniversariu del so gloriosu bombardéu a la ciodá, remembrando arguyosos comu mos mataron.
Y aplauden, miles d’asturianos miren al exércitu qu’atacó a civiles comu ellos nesi mesmu llugar, y aplauden. ¿Ignorancia? ¿falta de xacíu? ¿falta d’autoestima? ¿falta d’ética? de tou un pocu, pero más que na, la capacidá de la oveya media pa dexase llevar polo que dicen que “mola” ensin parase a camentar que igual ye una aberración.
Porque si, nun lo escaezamos, güei fai xusto 82 años los xixoneses miraben al cielu y veíen, tamién, aviones. L’ataque del 22 de xunetu dexó cuatro muertos, firios y abondes estroces materiales; los de los díes vinientes munchos más.
15 meses de bombardeos por mar y aire dirixíos pol exércitu español, 500 díes cayendo bombes enriba la ciudá, disparaes polos predecesores de los aviones que -cualisquier cosa menos inocentes- güei empuerquen el nuesu cielu, máquines de matar pilotaes por persones entrenaes pa saber matar, que cobren por saber matar.
Esos mesmos aviones, baxo la mesma bandera, tripulaos pol mesmu exércitu, xestando en so vientre les mesmes bombes, remanaos pol mesmu idegariu, atacaron Asturies nun va tantu tiempu-arrasaron Tarna, de Cangues dicíen “nun quedó piedra enriba piedra”- y ataquen anguañu poblaciones civiles comu la de nueso, xenerando nuees traxedies.
Véndenmos como arruelu prestosu les maniobres militares perriba la nuesa ciudá: esto namás ye posible gracies a una ignorancia bien planificada: los neños d’Asturies nun estudiaren nos llibros de testu la hestoria que nos fizo víctimes; escaecelo faenos candidatos de tornar a selo.
Llucía F. Marqués
This work is licensed under a Creative Commons Attribution 4.0 International License.
