El proyeutu CASTRUM  trata de facer resurdir la investigación castreña del Altu Nalón, nos conceyos de Llaviana, Sobrescobiu y Casu, col envís convertir la fastera nun focu cultural castreñu “ensin precedentes”

El Grupu d’Investigación Histórica de Llaviana, de la man d’arqueólogos ya investigadores de prestixu, comu Esperanza Martín ya’l so equipu,  tan trabayando na puesta en marcha d’un ambiciosu proyeutu d’investigación que  podría apurrir munchos ya importantes datos na so búsqueda de los raigaños.

En Llaviana hai dellos castros llocalizaos y hai ñicios serios d’otros. Nun ye estraño que s’alcuentren pieces de valor pel monte, trabayando la tierra, o escondío en desvanes o cueves. Piden a la xente que lo atope que, polo menos, apurran semeya ya información que pue ser mui util a la d’alcontrar otros resclavos.

Pa ello animen a quien alcuentre cualisquier restu o ñiciu de l’antiguedá a ponese’n contautu con ellos, alertando de la illegalidá ya escasa rentabilidá de vender estos afayos nel mercáu prietu “Una pulsera de bronce de cualquier túmulu nun llega a 10 euros, amén del delitu qu’implica, pero si los afayos d’esi torqués, o esa pulsera son comunicaos, los arqueólogos activaos y les coses se faen bien, el valor que pue aportar esi torqués o esa pulsera al nuesu pueblu como coleutividá ye impagable. Poro animamos a buscar ya informar d’eses coses encontraes, como dalgún hachu o una diestra llanza que sabemos que… nun tengas dalgo nel to salón que pertenez al to pueblu, nun sedría xusto pa los ancestros, pues robes la identidá a los tuyos”.

El llabor del  Grupu d’Investigación Histórica de Llaviana ciéntrase na recuperación del padremoñu del Altu Nalón, recoyendo lliendes, afayos, toponimies, buscando en llugares especiales… tou ello tratando d’afitar la memoria y la identidá de les sos xentes. Cuenten con delegaciones por Llaviana, Sobrescobiu, Casu, Piloña , Samartín del Rei Aureliu y Ayer.