Nel Díi Mundial Escontra la Minería a Cielu Abiertu, plataformes y movimientos sociales de tola Península Ibérica revindiquen el NON a la estración especulativa y contaminante

La Plataforma Oru Non de Tapia de Casariegu xúnese a otres 16 na so llucha pa paralizar les decenes d’espedientes solicitaos pa la implantación de mines d’alta contaminación per tola Península Ibérica

Denuncien el llaváu de cara que, dende los medios de comunicación y delles istituciones quieren facer de la megaminería,  vendiéndola a la población cola premisa de creación d’emplegu y asentamientu de la población. De fechu, acordies les estadístiques oficiales, la media de trabayadores nuna d’estes mines ye de menos 15 persones, un númberu bien inferior al de puestos de trabayu destruyios en seutores caltenibles ya esistentes y que desapaeceríen de permitise les mines. Ye’l casu de Salave, onde la implantación de la mina d’oru llevaría per delantre sieglos de tradición agrícola y ganadera, al tiempu qu’arruinaría a les persones que viven del turismu.

Los proyeutos n’estudiu, de llevase a cabu, tendríen un fuerte impautu nel usu de recursos naturales non renovables, esgotando la tierra fértil y acaparando agua que vuelve a los acuíferos contaminada con metales pesaos y tósicos químicos.  Dende la xunión de plataformes antimegaminería denuncien amás que dalgunos de los llugares nos que se solicita implantar minería son Padremuñu Mundial Agrícola, comu Covas do Barroso, en Portugal o Padremuñu de la Humanidá como la ciudá de Cáceres.

Nuria Prendes

This work is licensed under a Creative Commons Attribution 4.0 International License.