Dende Andecha Astur critiquen el posturéu ermu del actual presidente del “Principado” en cuestiones tan importantes comu la soberanía, la oficialidá o la renovación política del corruptu gobiernu d’Asturies
El despachu de Belarmino Tomás, presidente de la que foi la cabera istitución soberana llibremente escoyía polos asturianos, foi tomáu como botín de guerra pol Exércitu español tres l’acupación d’Asturies nel añu 1937. De magar entós, y fasta que nel añu 2.001 Andecha Astur solicitó la so devolución y la so declaración comu bien cultural, pigació escaecíu nun almacén militar ensin que naide pidiere la so torna al padremoñu asturianu.
Ante la indiferencia del “Principado”, istitución que si bien nun ye heriedera del Conseyu Soberanu sí que ye l’organismu que tendría de pidir la devolución al Exércitu Español, el partíu nacionaliegu continuó reclamando pola so cuenta al exércitu esti mobiliariu nos siguientes años. Finalmente, nel 2007 foi aprebada la so devolución y foi entregáu al “Principado”:
De magar entós tornó a pigaciar inutilizáu, fasta agora, cuando nuna maxistral demostración de puesta n’escena, Adrián Barbón robla nelli los sos primeros decretos comu presidente.
Dende Andecha Astur remembren-y a Barbón que nin el “Principado”, figura impuesta pol estatutu que los asturianos nun pudieron votar, ye heriederu del Conseyu Soberanu d’Asturies y Llión, nin elli representa, comu representó Belarmino Tomás, la voluntá soberana del pueblu asturianu.
En pallabres de Llucía Fernández, vocera de la organización “Barbón ta revelándose como un artista del posturéu, superando nel so campu al mesmu Podemos. Non contentu cola so maxistral actuación utilizando la llingua comu cebu elleutoral, pero ensin afitar la Oficialidá, pasó a falar de “la Nueva Asturies”, siendo comu ye un conocíu home de Villa, con cargos políticos nel partíu na dómina de mayor corrupción y cuya xestión si por daqué destacó ye pol grau de sumisión y servilismu a les polítiques emanaes dende Madrid. Agora utiliza la figura de Belarmino Tomás y del Conseyu Soberanu pa llimpiar la imaxe d’un “Principado” impuestu dende Madrid, remanando pa si tol simbolismu empreslláu nesos muebles, pero dexando a un lláu los valores que representa y tolo que seya Soberanía. Lo dicho, un artista.”
Redaición InfoAsturies
This work is licensed under a Creative Commons Attribution 4.0 International License.
