La Unión de Consumidores denuncia que COGERSA lleva 22 años incumpliendo los oxetivos de recoyida y reciclaxe de basories
Acordies la información que la mesma COGERSA fae pública na so páxina web, l’añu pasáu enterráronse cuasi 300.000 tonelaes de papel, vidriu, envases metálicos, bricks y materia orgánico, tou ello aprofitable, nel vertederu de COGERSA, del que yá anuncien que-y queda pocu pa tar saturáu y precisar nuevos espacios.
En concretu, enterráronse 123.850 tonelaes de papel/cartón, vidriu y envases llixeros y más de 167.800 tonelaes de materia orgánico de orixen domésticu, en conxuntu más de 290.000 tonelaes de materiales que podríen ser aprofitaos.
Ello implica que depués de 22 años de la entrada en vigor de la Llei 11/1997 d’Envases, el Consorciu pa la Xestión de los Refugos d’Asturies (COGERSA) ta a una distancia de 50 puntos de cumplir colos oxetivos de recoyida dixebrada y recicláu de basories d’orixen domésticu. Cuando tendría que recoyese pente’l 55% ya’l 80% de los envases, n’Asturies recuéyesne dixebradamente y recíclase menos del 30% -53.195 tonelaes de les 177.050 xeneraes, dexándo lloñe l’oxetivu européu de recuperar 138 Kg/hab/añu d’envases llixeros, vidriu y cartón.
Les desemeyances pente fasteres, sicasí, son descomanaes. Na so web COGERSA namás informa de los mayores núcleos de población, pero mesmo pente ellos los datos son estremaos. Asina, mientres en Xixón se recuperen 65 Kg/Hab/añu y n’Uviéu 59, les proporciones van baxando acordies la población ye menor: n’ Avilés recupérense 47 Kg/Hab/añu, en Sieru 46,5, en Mieres 41 y en Llangreu 39. Nes fasteres más rurales la distancia a los puntos de recoyida o incluso la falta de contenedores de reciclaxe xunto a los de basoria mecío dificulta la participación ciudadana.
Espérase que pa esti añu les cifres ameyoren: la implantación de contenedores de reciclaxe de materia orgánico, pesi a les duldes que xeneren na población (¿porqué hai qu’abrilos con tarxeta? ¿que bolsa o recipiente hai qu’utilizar pa ellos?) tan meyorando abondo la tasa de reciclaxe compostable y la planta de reciclaxe d’envases vien de ser ampliada, ante la imposibilidá de procesar la cantidá de material que los ciudadanos separten (un 27% más que va 4 años).
Dende la Unión de Consumidores proponen, amás d’averar al usuariu los puntos de recoyida, incentivar económicamente el reciclaxe, aplicando descuentos na tasa de basories a quienes dixebren los sos refugos ya implantando’l Sistema de Torna d’envases al puntu de venta, devolviendo al consumidor la cantidá cobrada pol envase.
Consideren imprescindible la ellaboración de Planes Municipales qu’adauten la recoyida a cada realidá llocal y desixen tamién la sustitución del equipu direutivu de COGERSA “pola so responsabilidá na nefasta xestión de los refugos a lo llargo los caberos 20 años”.
Redaición InfoAsturies
This work is licensed under a Creative Commons Attribution 4.0 International License.
