Mariano Suárez, autor del llibru “Quién escaeció a Belarmino Tomás”

Adrián Barbón, cola so política de xestos y apropiación de símbolos, ta ocupándose d’ablanquiar la so propia figura, faciendo inútilmente por separtala del pasáu corrutu y antiasturianu que representó (y representa) el PSOE

Ye un intentu vanu de paecer un gobernante “nueu”, con supuesta “responsabilidá cero” nos tiempos en que’l PSOE finó cola Asturies productiva y caltuvo una fuerte represión identitaria y llingüística. Y, nesti intentu, Barbón quier amosase capaz de llegar más allá que naide del PSOE.

Poro, de xuru que munchos pesos pesaos de la FSA-PSOE retremaron na siella al ver la páxina de Facebook de Barbón, coles semeyes onde firma los primeros decretos nel despachu de Belarmino Tomás, el presidente del Conseyu Soberanu d’Asturies y Lleón.

Un mobiliariu que si agora tien la condición de bien hestóricu, ta restauráu y recoyíu dinamente ye porque Andecha Astur denunció hai años que dende 1937 esti despachu permanecía secuestráu, comu botín de guerra, nes istalaciones del antiguu Gobiernu Militar español n’Uviéu (na plaza España).

Demientres décades al PSOE nun-y dio más qu’esi despachu fore botín de guerra del exércitu español. Namái cuandu se vio públicamente retratáu, sintióse forciáu a solicitar la so devolución, que se llogró.

Andecha Astur pidió al gobiernu asturianu en 2001, 2002 y 2003 que desixere la torna del despachu a los militares españoles y que fore declaráu Bien d’Interés Cultural. Sólo al traviés d’un periódicu se consiguió saber en 2007 que’l gobiernu de Tini Areces recuperare’l despachu; pero aquel PSOE d’Areces llevó tol trámite en secretu, avergoñáu de tener que facer daqué en memoria de Belarmino Tomás. Nesos años Barbón nunca nun gutió defendiendo esi despachu comu padremuñu asturianu; obedeció bien entós les indicaciones del PSOE de Tini y Villa.

Los fechos perafiten qu’a la FSA-PSOE nunca nun-y importó un res esi despachu, y que-y interesó mucho menos la figura del propiu presidente Belarmino Tomás.

El SOMA y el PSOE lleven décades abondes faciendo un homenax añal a Manuel Llaneza, nel cementeriu civil de Mieres. Nunca nun tuvieron reparos morales pa rindir tributu a esti collaboracionista de la patronal y de la dictaúra de Primo de Rivera. Pero enxamás quinxeron saber ná de reconocer públicamente al caberu presidente llexítimu d’Asturies y primer presidente d’una Asturies socialista y soberana. El SOMA y el PSOE (y tolos demás partíos españoles) siempres escaecieron o boicotearon les iniciatives qu’hebio (munches de la familia, munches d’Andecha Astur) pa homenaxear a Belarmino Tomás na so sepultura nel cementeriu Pando (Llangréu), pa dar el so nome a cais o edificios públicos, pa remembrar oficialmente feches importantes de la so biografía, pa conservar afayaízamente la so casa en La Gargantá (Llangréu), pa facer una gran esposición na so memoria, etc. Y Barbón tampocu nun gutió nesta custión.

El PSOE tuvo más de 80 años acallentando la figura de Belarmino Tomás y poniéndose a llarga distancia de la so obra y memoria. El PSOE tuvo más de 80 años trabayando pa que’l Pueblu Asturianu escaeciere a Belarmino Tomás y la so declaración del Conseyu Soberanu d’Asturies y Lleón, en 1937. El PSOE llevó al BOPA mesmamente unos currículos educativos nos que s’escaez arrémente esti presonax y l’Asturies soberana d’aquella dómina.

Y agora… vien Barbón y “okupa” la siella del presidente Belarmino Tomás.

Evidentemente, a Barbón nun-y dio de sópitu un esparabán que lu tornare soberanista asturianu. Non, sigue siendo’l cabezaleru d’un partíu español, que pa dalgo xuró’l cargu presidente cola man enriba d’una de les primeres ediciones de la costitución borbónica de 1978. Si por dalgo quinxo retratase na siella’l presidente Belarmino Tomás foi por apropiase y utilizar el valor simbólicu que p’Asturies tien esi despachu. Barbón créyese agora sagrámente unxíu del respetu hestóricu qu’a los asturianos mos merez Belarmino Tomás.

Pero, ta claro, Barbón enquivócase. Cuandu los guerreros tribales comen al so enemigu, nun consiguen apoderase de les fuercies del so espíritu nin de los sos méritos, sólo amuesen el más despiadáu canibalismu (políticu, nesti casu).

This work is licensed under a Creative Commons Attribution 4.0 International License.