L’espeutáculu del Cirque de Soleil clisó a la multitú que s’averó a conocelu, nel so díe d’estrenu, al Muelle la Osa (nel xixonés puertu de El Musel), onde continuará dica’l 1 de Setiembre
“Kooza” quier dicir cofre o ayalga, una caxa de la que, baxo la direición de David Shiner, surden demientres más de dos hores les maravíes que tresporten a los espectadores al traviés de los escenarios d’un universu con tastu oníricu, enllenu movimientu, misteriu y llume. Un homenaxe a la tradición circense, que combina maxistralmente dos de les principales tradiciones del cirque: les acrobacies más ablucantes col arte de los payasos, tou ello cola banda sonora que, en direutu, fusiona jazz, funk y ritmos de Bollywood.
Pero nun ye namás l’espeutáculu: entrar nel Cirque du Soleil ye yá en si mesmo pasar a una realidá paralela, que tresforma al espeutador en protagonista: el tratu esquisitu xuníu a la atención a los detalles son claves pa dir llevando a los asistentes al estáu d’animu idegal pa entrar de lleno no que dende’l mesmu circu definen comu “un reinu cómico de personaxes escéntricos, emociones lletrizantes y sospreses que se salen de lo avezao”.
Ñacíu en 1984 con un ensame de 20 artistes caixeros, Cirque du Soleil cuenta agora con un ellencu internacional d’acróbates, músicos, cantantes y actores, sofitaos por un equipu de cerca de 4.000 persones, incluyendo 1.400 artistes de más de 70 países que percuerren el mundiu espardiendo la so maxa. Nesos 35 años más de 200 millones d’espectaores en más de 450 ciudaes d’alrodiu 60 países de 6 continentes ablucaron col so espectáculu. Esta ye la cuarta vegada que la carpa del Cirque du Soleil pasa per Xixón, dempués del estrenu de Varekai en 2009, Saltimbanco (2004) y Alegria (2007).
Les entraes puen mercase por interné o nes taquilles iguaes pa ello nel Teatru Xovellanos o nel Corte Inglés pero tien de ser ceo porque tan a piques d’esgotase y nun hai opción de prórroga, ya que’l circu tien de continuar cola so xira de magar l’un de Setiembre. Una llinia especial de bus facilitará los acesos al Muelle la Osa.
Llucía F. Marqués
This work is licensed under a Creative Commons Attribution 4.0 International License.
