Cerca de 5.000 asturianos pendientes de ser atendios pola Conseyería de Servicios y Drechos Sociales
De los 24.932 asturianos que’l mesmu Imserso reconoz con drechu a recibir un sofitu por dependencia (ya seya prestación económica, cientru de díi, de nuechi, aída a domiciliu, teleasistencia o asistencia personal) namás 21394 lu reciben, ello ye, que 3538 esperen una rempuesta demientres viven en condiciones mínimes, nel meyor de los casos ausiliaos poles families. Munchos d’ellos nun ven reconocíu’l so drechu fasta que ye sero y nun son raros los casos nos que la carta de Servicios Sociales concediendo’l sofitu aporta dmepués del fallecimientu del dependiente. Una cifra qu’espeya la llentitú de la xestión d’estos casos: pesia la llarguísima llista d’espera, nun añu resolviéronse 71 casos, ello ye, precisaríense 50 años pa resolver los casos pendientes a esi ritmo, un tiempu superior a la esperanza de vida de los solicitantes.
Per otru lláu, el Salariu Social Básicu, ingresu destináu a aquelles presones que perciben menos de 430 € al mes, tien un retrasu de más de siete meses na so xestión, lo que dexa a 1.089 asturianos en situación d’emerxencia ensin la cobertura que llegalmente yos correspuende.
Arriendes d’ello, miles de casos tan pendientes de revisión, tantu a l’alta comu a la baxa, ello ye, que los cambeos na situación personal nun s’espeyen nel salariu dica meses o incluso años dempués. Los casos más avezaos son l’aumentu del númberu de miembros de la familia (con drechu a xorrecimientu de la prestación) o consecución d’un trabayu (qu’estinguiría o amenorgaría nel importe del sueldu la cuantía a percibir).
El problema, pa los trabayaores sociales dedicaos a estos temes, ta na falta de presonal pa xestionalo, demandando urxentemente l’aumentu de plantiya pa poder poner al díi estes cuestiones, n’abondos casos d’estrema urxencia.
This work is licensed under a Creative Commons Attribution 4.0 International License.
