Los fechos tuvieron llugar n’Uviéu, concretamente en Ciudá Narancu, nel añu 2012, cuando Jorge (en füelga de fame pa revindicar el so drechu a vivienda), la so pareya, Patricia, ya’l so retueyu de namás 6 meses, Amanda, foron espulsaos del so llar. Tres d’un primer intentu  de desfiuciu de la familia, frustráu gracies a la solidaridá ciudadano, tuvo llugar un nuevu intentu nel que hubo fuerte intervención policial, con más de sesenta policies antidisturbios cargando demientres cuatro hores contra les más de 300 persones aconceyaes pa torgar el desfiuciu. Los presentes afirmen que la violencia de les cargues foi desproporcionada.

Venti persones foron detenies na operación policial y otres delles identificaes, de les que cinco (les 5 del Naranco) pasaron a xuiciu 7 años dempués -una dilación nel tiempu irregular dafechu-. A díe de güei, 17 años depués,  dos más tan pendientes de ser xulgaes: Lucía y Hugo, dos más pente les 300 que s’alcontraben esi díe protestando na cai, pero que lleven careciendo 10 años d’incertidume y fiances imposibles de pagar que los llevaron a difíciles situaciones económiques.

D’esti casu destaca non solo el retrasu pente los fechos y la imputación, sinón la total ausencia de violencia emplegada poles persones allí aconceyaes (incluyios los imputaos), que contrasta cola violencia emplegada polos antidisturbios y cola acusación de “menacies, atentáu y llesiones a l’autoridá”.

La estratexa aplicada nos caberos años pa paralizar la movilización social consiste precisamente en detener aleatoriamente a persones participantes n’actos revindicativos y xulgales por “delitos” que yos pueden acarretar series consecuencies a llargu plazu, semando la llerza y tratando de francer la solidaridá.

Poro, les 5 del Naranco cuenten agora con recibir el sofitu y la solidaridá que’n so día amosaron pa colos demás y esperen cuntar cola rempuesta del pueblu asturianu nel xuiciu que se cellebrará nos dies 8, 15, 22 y 29 de Payares de 2019 nel Xulgáu de lo Penal Nº1 d’Uviéu y nos actos que s’entamen pa sufragar los gastos xudiciales y les posibles multes.

Llucía F. Marqués