Ca vegada qu’un mélicu del ária sanitaria V (Conceyu de Xixón) garra una baxa, un permisu o unes vacaciones, el puestu queda vacante, porque nun hai nin un solu mélicu disponible pa cubrilu fasta l’añu que vien: toos ellos tienen contratu robláu, comu pocu, dica’l 31 d’Avientu. Falamos de Xixón, el conceyu más pobláu d’Asturies, qu’acomuña más de la cuarta parte de los moraores del país y que’n branu duplica la so densidá por mor del turismu.
La consecuencia más evidente ye que nun se cubre les necesidaes de los pacientes, nin en consultes nin nes urxencies nin nos quirófanos. Dellos pacientes tan recibiendo cartes nes que, cenciellamente, s’anula la cites concertaes dende va selmanes o meses: cenciellamente, nun hai mélicu que los atienda. Les llistes d’espera medren y los profesionales que tienen que cubrir la demanda acusen el cansanciu y l’estres, col consiguiente deterioru de l’atención. El sobreesfuerzu d’atender una media de más de 2.200 pacientes por mélicu en consulta (más domicilios y urxencies) pasa factura y multiplica les baxes de los profesionales, agravando’l problema. Amás, son munchos los que tan solicitando la xubilación anticipada, lo que contrasta cola “solución” propuesta d’atrasar les xubilaciones.
Nun ye un problema nuevu, la falta de personal -especialmente en periodu vacacional- lleva más de diez años denunciándose, pero los coordinadores de los cientros de Salud denuncien que va a más, faltando davezu cuasi un terciu del equipu. Ellos foron los que dieron la voz d’alarma sobro la falta de reemplazos, al traviés d’una carta al recién estrenáu conseyeru de Sanidá, Pablo Fernández Muñiz. Ye cierto qu’entá nun pasaron los cien díes de rigor pa valorar la so xestión pero “al fin y al cabu ye la continuidá del gobiernu anterior, que foi el que llevó la sanidá asturiana a esta situación”.
Nes sos reclamaciones, los mélicos apunten a soluciones evidentes: una meyor organización, ampliar el númberu de places na facultá (na d’Uviéu los númberos clausus torgaron a más de 8.000 estudiantes cursar gráu en salú) y nes especialidaes MIR, pero sobro tou, que se contraten mélicos, porque n’Asturies nun falten mélicos, falten contrataciones. De fechu, los titulaos asturianos son los que más se ven forciaos a emigrar a la gueta trabayu de tol estáu.
Los pacientes coinciden con esta valoración negativa de la evolución de l’atención sanitaria nos caberos años: una encuesta fecha nos 12 Cientros de Salú de Xixón pola Federación d’Asociaciones de Vecinos y a la que retrucaron más de 1.500 persones amuesa que los xixoneses opinen que l’atención sanitaria desmeyoró nos caberos años, desapreben l’agrupación de cientros d’atención continuada y l’aumentu de medicamentos de pagu.
Nuria Prendes
This work is licensed under a Creative Commons Attribution 4.0 International License.
