Esta especie invasora, qu’entró dende Galicia alrodiu l’añu 2016, espárdese con rapidez y la so alimentación a base d’abeyes pon en peligru, non solo los casiellos, sinón la mesma agricultura, ya que más del 60% de los cultivos dependen d’elles pa la so polinización.

La llucha del Conceyu de Salas, un de los más afeutaos, contra la invasión de la viespora velutina tien más de dos años, pero nun paez qu’avance, más bien a la contra, el insectu va ganando posiciones y dende Salas piden sofitu al “Principado”: investigación y mayor eficacia nel desaniciu de los ensames. Nesi sen, acusen d’inación al “Principado”  pola llentitú cola que se respuende a los avisos: de los 23 ñeros de viespora denunciaos ya ensin retirar dalgunos tan avisaos de va ya más d’un mes.

Denuncien que dende l’entamu el “Principado” fexo casu omisu de la gravedá del problema, negándose fasta va dos años a confirmar la presencia de la plaga nel conceyu. Cuando por fin lu reconocieron, los medios d’eliminación puestos en marcha foron insuficientes y nun se punxo en marcha dala investigación.

El mayor pesu de la llucha contra la velutina vien desendolcándose al traviés del Grupu de Trampéu, agora Asociación Antivelutina, que ya denunciare la presencia de la especie invasora nel conceyu anantes de la confirmación oficial, entamando charres informatives a cargu de Luis Laria pa que los vecinos foren coscientes de la gravedá del tema. Esti añu alcontraron cuasi un centenar (99) de ñeros, más del duple de los topaos l’añu pasáu por estes feches, lo que, xunto cola ampliación xeográfica de la fastera afeutada, fae albidrar que la plaga lloñe de desapaecer ta faciéndose más fuerte.