Tratar de guardar la ropa y al tiempu nalar, cuando se trata de política, de drechos o de dignidá, ye asegurar el ridículu. Sicasí, ye la especialidá de dellos partios políticos, mui especialmente equí, n’Asturies
Ésitu de la convocatoria antitaurina na que miles de persones convocaes por ANADEL y otres 40 organizaciones y partios (pente les que nun apaez el PSOE) tornaron a manifestase ayeri reclamando la fin de la Feria Taurina de Begoña, la cabera d’Asturies, una cellebración sanguinaria ya incongruente que recibe la refuga de los asturianos ca añu, pero que ca añu se repite cola aquiescencia y sofitu del Conceyu de Xixón, que renueva’l contratu de la plaza, permite la cellebración y pon perres enriba.
Sicasí, esta manifestación nun dexa de ser una demostración de la voluntá popular y los magos del posturéu nun diben perder la ocasión, asina que los mesmos que programaron la matanza apaecieron a protestar por ella.
Nesta ocasión la película ye de la mesma productora de “Soi defensor del asturianu pero nun doi la Oficialidá” ya “Siéntome nel despachu d’un soberanista asturianu pa roblar en nome da la costitución que mos somete a España”. Esti fin de selmana aportó a les cais la película “Permito y subvenciono la Feria de Begoña pero voi a la mani antitaurina”. Nesta cabera ocasión el protagonista varía, pero con o ensin Barbón al frente la hestoria ye la mesma.
Una movilizacion multitudinaria na que’l pueblu asturianu reclama los sos drechos (y nesti casu los drechos d’otros seres vivos), decenes de miles de persones na cai… ¿y que ye lo que ven dende’l PSOE? una oportunidá más de salir na semeya, pancarta per delantre. ¿Qu’ellos mesmos son los responsables de que continúe la tortura en Xixón? ¿que ye al PSOE mesmu, partíu que gobierna na ciudá, a quienes se ta desixendo que prohiban les corries en Xixón? Da lo mesmo. Si de lo que se trata ye de quedar bien y salir na semeya… el resto, que quede pa práu.
Nun foron los únicos. Pente les abondes pancartes, representantes de partíos que nel so intre, col so trabayu conxuntu, pudieron finar cola feria: PSOE, Xixón si Puede, IU… El trabayu conxuntu de los conceyales d’esos grupos sedría abondo pa finar cola feria, ensin falta de prohibiciones siquiera, o de referendums comu’l propuestu por Xixón si Puede (¿dende cuandu los drechos se voten?). La retirada de la subvención municipal con la que añalmente se financia esta feria, polo demás non rentable, valdría para finar con ella, lo mesmo que la retirada de la concesión de la Plaza el Bibio, de titularidá municipal.
Un detalle: nel díe de mayor llenu, la Feria de Begoña nun algamó a enllenar los ¾ de la plaza, dejando cerca de 4.000 entraes en taquilla, pesi a que dellos cientos d’elles foren regalaes y pesi a los autocares d’aficionaos venios dende fuera d’Asturies.
El presupuestu pa financiar esta actividá sae en bona midía de les arques municipales.
This work is licensed under a Creative Commons Attribution 4.0 International License.
