Andecha Astur tornó a revindicar el Conseyu Soberanu d’Asturies y Llión comu referente hestóricu d’una Asturies llibre y comu cabera istitución democráticamente escoyía pol Pueblu Asturianu
La xornada entamó con una visita a les trincheres del “Parapetu”, dende onde se defendieron les posiciones asturianes ante l’avance de les tropes facistes españoles, italianes y alemanes.
Trincheres na cume del Filispardi
Tres de l’ardua xubía los participantes nel actu pudieron, non solo almirar la impresionante obra de los guerrilleros asturianos al escavar les trincheres, sinon sentir del hestoriador Donato Joaquín Villoria el resume de la llucha que se desendolcó n’aquelles cumes y comu la derrota aportó per otru lláu.
Ya nel monolitu que rinde homenaxe a los heroes de Tarna tuvo llugar l’actu d’homenaxe, que cuntó tamién con participación llionesa. Nel actu Llucía Fernández Marqués, en nome d’Andecha Astur, revindicó una vegada más la importancia del Conseyu Soberanu d’Asturies y Llión, al que declaró “un referente a siguir y cabera istitución democrática escoyía polos asturianos”, insistiendo en la intención de durabilidá del Conseyu, que’n tiempu record encadarmó un estáu, colos sos organismos internos, con moneda, sellos, reconocencia internacional ya exércitu propiu. “Un exércitu piqueñu, si lu comparamos colo que se nos venía enriba, un exércitu d’homes y muyeres de toa Asturies qu’aportaron equí, a les trincheres que visteis esta mañana, escavaes na mesma roca, y consiguió detener colos sos escasos medios al exércitu facista, escribiendo entós una de les hestories mas brillantes de resistencia d’un pueblu escontra l’invasor y escontra’l colonialismu, nuna amuesa de valor que pudo camudar el cursu la hestoria pero que la gran mayoría de los asturianos y llioneses desconocen dafechu”.
Recalcó tamién el posicionamientu a la escontra de la República Española “Que prefirió una España facista xunida qu’una República Asturiana llibre” y comu los fechos asocedios entós siguin marcando la política y la situación d’una Asturies que “carez d’un sistema políticu ayenu, impuestu tres de la mal llamada transición, que nin los asturianos nin los llioneses -a diferencia d’otros pueblos del estáu- tuviemos la posibilidá de votar. Los partios que mos gobiernen nun son otros que los heriederos de los dos bandos que, va 82 años, cuando nos declaremos soberanos, se posicionaron a la nuesa escontra: los facistes y los supuestamente repúblicanos españoles. Nun vendrán d’ellos les soluciones” finando’l so discursu con un llamáu al compromisu y al avance faza una República Asturiana Soberana.
Redaición InfoAsturies
This work is licensed under a Creative Commons Attribution 4.0 International License.
