El 5 d’ochobre presentaráse la campaña de crowfunding pa financiar el primer xuegu de rol n’asturianu, nel que se propón una hestoria paralela na qu’Asturies ye una República soviética

¿Qué pasaría si el 5 d’Ochobre de 1934 Cataluña aguantare xunto con Asturies, dividiendo al exércitu español en dos frentes? ¿Y si la resistencia minera, más fuerte por esta España enfeblecida, ispirare a otres ciudaes del estáu declarándose la Fuelga Xeneral? Nesta versión el gobiernu revolucionariu d’Asturies, con Belarmino Tomás al frente, pidi l’ingresu d’Asturies na URSS y la so propuesta ye aceutada por Stalin, camudando’l cursu la hestoria.

Coincidiendo col 82 aniversariu de la Declaración de Soberanía del Conseyu Soberanu d’Asturies y Llión, presentose la portada d’esti xuegu, escritu pol novelista Nicolas Bardio  -conocío por ser l’autor de la novela policiaca «Sol Reló» o de la novela ucrónica «Cuando ensamen les abeyes» – y cuntará coles ilustraciones de Xon de la Campa, qu’illustró ya otres obres como les tornes al asturianu de «La Celestina» o «Drácula».

«Depués de Ochobre» plantega un xuegu nel que los participantes son axentes asturianos del KGB de los años setenta, a la gueta d’espies franquistes, americanos, británicos o franceses per tola xeografía asturiana, convertida nuna República Socialista Soviética. La hestoria camuda radicalmente pa los asturianos.

El rusu ye cooficial xunto col asturianu, Xixón tien una base de somarinos nucleares, hai una cientral nuclear en Navelgas, l’Aeropuertu  Internacional Aida de la Fuente ta en Llanera ya’l de Ranón ye una base militar enllena de Mig-25 . Mieres (agora Mieres del Camín al Socialismu) ye’l Holliwood socialista  y Grau renómase comu Belarminograu.

El xuegu de rol “Depués d’Ochobre” ye autoeditáu y nun recibirá dala subvención, polo que guetará los fondos pa la so edición nuna campaña de crowfunding que se presentará’l 5 d’Ochobre, coincidiendo col 85 aniverariu de la revolución d’Ochobre.

Nuria Prendes

This work is licensed under a Creative Commons Attribution 4.0 International License.