El Llunes 16 tendrá llugar el xuiciu a los Once solidarios del Reconquista; los trabayadores faen un llamamientu a concentrase a les puertes del xulgau pa dar el so sofitu pa los acusaos, a los que se yos pidi cárcele y multes por denunciar públicamente les condiciones llaborales que carecen

La xestión del hotel pol Grupu Hotusa, de magar el 2.014, ye fonte de conflictos continuos: la esplotación llaboral nel Hotel Reconquista ya fore condergada nel 2017, cuando el Tribunal Supremu falló a favor de la trabayadora Raquel Agüeros, expresidenta del comité d’empresa y víctima d’acosu llaboral pola so denuncia de les condiciones d’esplotación que se carecen nel emblemáticu hotel. Posteriormente, el 10 de Xineru del 2018, la sentencia  del Tribunal Superior de Xusticia d’Asturies declaró’l so dispidu improcedente.

Na rueda de prensa convocada nel Hotel pa la presentación de FITUR, al díi viniente de conocese esta cabera sentencia, un ensame de persones entren con pancartes a la voz de “Toos somos Raquel”. La protesta, que non solo sofitaba a Raquel sinon que denunciaba la esplotación llaboral nel Reconquista y la desidia del “Principado” al consentilo, duró esautamente 6 menutos y desendolcóse en calma, comu recueyen con claridá los vidios espublizaos en prensa darréu l’acusación.

Nel vidiu pue vese comu entren pacíficamente con dos pancartes y, tres de pidir esculpies a la prensa pola interrupción, Marco Antuña -sindicalista- garra la pallabra pa denunciar les práutiques llaborales nel Reconquista y la pasividá del “Principado”, recordando que la titularidá del Hotel ye pública seique la so xestión seya privada. Nel vidiu puede vese tamién que na entrada a la sala (intre en que se produxo la supuesta agresión) nun hai dalu enfrentamientu y que los únicos momentos de tensión vinieron darréu unos menutos, cuando parte de los asistentes a la rueda de prensa se llevantaron pegando voces ya interrumpiendo a Marcos Antuña, pero tampocu entós hebio respuesta violenta por parte de los trabayadores, qu’abandonaron la estancia cuando entá nun pasaren 6 menutos dende la so entrada. Otru vidiu, apurríu comu preba, recueye los momentos previos a la entrada, dexando nidio que nin hebio glayios previos (comu denuncia l’acusación) nin agresión al pasar xunto a la directora (que apaez en vidiu coles manes en bolsu) ya’l sindicalista de la UGT. L’Hotel cuenta col vidiu íntegru de los fechos, grabaos poles cámares de seguridá, pero nun lu apurre al xuiciu.