Entrevistamos a Ana Fernández, d’Andecha Astur, tres de la so participación comu representante d’Asturies na dellegación internacional de la Diada, una esperiencia que compartió con flamanes, quebequianos, vascos, bretones, gallegos y otros representantes de naciones ensin estáu

“La represión que n’Asturies tenemos interiorizada y asumida comu normal ye difícil d’entender dende otres naciones.”

Esta ye la primer vegada que tas presente na Diada y nos actos de los díis enantes ¿Qué foi lo que más te impresionó?
Hebio dos intres. Ún d’ellos foi cuando nos averábemos cola ofrenda floral a Rafael Casanova y dende fuera de la cellebración entamó a sonar l’himnu d’España al altu la lleva, una nidia prevocación que buscaba la marraza. Los compañeros vascos y yo mirémosmosos en tensión, pero los catalanes nun se inmutaron; como muncho subieron el volume mentes canciaben “Els Segadors”. Entrugaos pola so reaición (o meyor, pola so falta d’ella) dixeron namás que “xente ensin educación y cultura hailo en tolos llaos”. Había un dispreciu absolutu na so indiferencia.
L’otru foi un momentu de fonda emoción, al entamu del actu istitucional -que tuvo de ser retrasáu del primer díi al caberu por mor de la lluvia- cuando, tres del solemne izáu de la bandera, entamó a sonar la frase del poeta Joan Brossa, “la gent no s’adona del poder que té”. Respigaba la fuercia que tresmitía.

¿Diries entós qu’esi fo’l mensaxe cientral de la Diada?
Ún d’ellos, si, pero non l’únicu. El primeru foi “nun hai llugar pa traidores”, escenificáu na hestoria de la Fosa les Moreres. Depués, comu un mensaxe cnstante, la resistencia del pueblu frente a la opresión y la esperanza na llibertá… de fechu lo qu’ellos cellebren na Diada ye’l caberu intre en que foron libres, remembrando qu’esti que viven agora nun ye’l so estáu natural y que recuperarán esi estáu. Y por supuesto, “tornarem”, el mensaxe repetíu milenta vegaes pidiendo’l regresu de los presos y los esiliaos.

En dellos medios españoles destacábase la “crispación” y “tensión” que se vive en Catalunya… ¿detectaste esi sentir nes cais?
Tolo contrario. L’ambiente yera festivu, acoyedor, cargáu de fuercia, eso si, pero ensin una plizca de violencia nin “crispación”. Tienen nidio que va ser un procesu llargu, pero que ganarán y recuperarán la so independencia, saben que son la gran mayoría del pueblu catalán y tan dimpuestos a percorrer el camín ensin priesa, pero ensin dar un pasu atrás.
Otra cuestión na que ta nidio que mienten los medios españoles ye’l númberu presones. Nun se podía mover ún, nun había pa onde dir, nun había espaciu, de fechu nun foi un manifestamientu sinón una macroconcentración: nun se pudo avanzar. Ellí había, de llargo, más d’un millón de presones.

¿Cómu se ve Asturies y la so situación dende Catalunya?
Hai un fondu desconocimientu, igual que a nós mos venden una imaxen distorsionao de Catalunya, a ellos véndese-yos una imaxen distorsionao d’Asturies. Amás, les rialidaes son tan estremaes que-yos cuesta facese una idega. Cuestiones comu’l silenciamientu costante per parte de los medios de comunicación, cuando ellos los tienen del so lláu, la represión llingüística o el boicó de les autoridaes a cualisquier cuestión qu’arrecienda a identidá asturiana, el desconocimientu de la hestoria por parte de la población ya’l silenciu istitucional, el desaniciu sistemáticu, la emigración forciada, la represión llingüística… tou ello son cuestiones que se-yos faen increyibles dende’l so puntu de vista. La represión que n’Asturies tenemos interiorizao y asumío comu normal ye difícil d’entender dende otres naciones.

This work is licensed under a Creative Commons Attribution 4.0 International License.