Con esta medaya ya’l futuru nomamientu de “Fiu predilectu d’Asturies” pa tres guerrilleros antifacistes, aporta por fin el naguáu reconocimientu oficial nel propiu país pa estos héroes de la llucha contra’l facismu
El pasáu mes de Xunetu FAMYR y l’Atenéu Obreru de Xixón, col sofitu de 45 asociaciones y partios políticos -pente los qu’alcontramos a Andecha Astur, el PCE, IU d’Asturies o Podemos- solicitaron la concesión de l’entítulu de “Fios Predilectos d’Asturies” a los soldaos antifranquistes Cristino Garcia Granda, Felipe Matarranz y Juan Antonio Alcalde y la “Medaya d’Oru d’Asturies” pal caberu superviviente asturianu de los campos de concentración nazis, D. Vicente Garcia Riestra.
La propuesta foi refugada nun entamu -por tercer vegada, siempres por parte d’un gobiernu socialista-, lo qu’orixinó fuertes crítiques al presidente, Adrián Barbón, por conceder esti honor a una persona de dudosa honestidá, un de los principales responsables del desaniciu del texíu socioeconómicu asturianu y reconocíu cómpliz de la corrupción del SOMA-PSOE, comu ye’l casu de Vicente Álvarez Areces, al tiempu que la ñegaba a estos héroes reconocios a nivel de toa Europa.
La llabor conxunto de les asociaciones de memoria y la presión social pa que se reconoza la figura d’estos antifacistes, fexo posible que’l “Principado” de finalmente’l naguáu pasu, concediendo a títulu póstumu a Vicente García Riestra la Medaya d’Oru d’Asturies, abriendo amás l’espediente que nomará “Fios Predilectos d’Asturies” a Juan Antonio Alcalde, conocíu como “Comandante Robert”, a Felipe Matarranz, nomáu tamién “Comandante Lobo” y a Cristino García Granda.
Faese con ello xusticia a la memoria d’unos heroes que fasta agora yeren namás reconocios comu tales en Francia, Alemania y Rusia, pero non nel so propiu llar.
Nuria Prendes
This work is licensed under a Creative Commons Attribution 4.0 International License.
