L’alcalde de Nava da plantón a los responsables del Mercáu Social de Nava nel conceyu previstu pa iguar les torgues que dende la Casa Conceyu se tan poniendo al so normal desendolcu

El Mercáu Social de Nava lleva tres años cellebrándose’l tercer sábadu de cada mes, pero nes caberes ediciones la intervención, por orden de la Casa Conceyu, de les “fuercies de seguridá”, que tienen el mandáu de dir el díi de mercáu a revisar y pidir documentación de tolos puestos, ta estorbando’l so normal desendolcu. Poro, los sos organizadores concertaren esta selmana un conceyu col alcalde, col envís d’iguar la cuestión. Sicasí, y tres de cerca d’una hora d’espera, el rexidor decidió nun atendelos.

En consecuencia, ya en vista de que nun hai garanties pa que’l mercáu se desendolque en paz, deciden suspender el mercáu del sábadu 21 y facer d’esi díi una xornada de protesta pacífica y festiva, convocando a una rueda de prensa na qu’informarán de la situación desencadenada pol Ayuntamientu y la so postura. “Necesitamos tiempu p’armanos y protexenos -declararon- porque sabemos que tenemos la llegalidá de la nuesa parte.” Darréu l’actu tendrá llugar un conciertu a cargu de Sandra Zamora.

El Mercáu Social de Nava defínese comu “una apuesta pola creación d’una rede de producción, distribución y consumu de bienes que furrula con criterios éticos, democráticos, ecolóxicos y solidarios, na comarca del nuesu conceyu, costituyida tanto por coleutivos d’economía solidaria y social como por consumidores”. Esta aniciativa ciudadana ñaz comu rempuesta frente a los trataos de llibre comerciu (TTIP, CETA, TISA) y énte la práutica desapaición del mercáu selmanal de Nava, col envís de crear un espaciu de mercáu dende abaxo qu’atraiga a población mozo al conceyu, dando un espaciu a los piqueños productores pa vender los sos productos. Nelli participen d’avezu agricultores ecolóxicos llocales, artesanos y piqueños ellaboradores, pero tamién se desendolquen nel mercáu actividaes d’arruelu y folixa, siendo la música en vivo una de les sos carauterístiques más señalaes.