Uviéu sedrá’l puntu d’alcuentru n’Asturies na xornada de Fuelga Mundial pol clima del 27 de Setiembre; un díi anantes la Plataforma contra la Contaminación de Xixón convoca un manifestamientu peles cais de La Calzada

El xueves, a les 19.00 hores delantre la ilesia de Fátima, saldrá un manifestamientu col llema “Pola Salú en Xixón. Contaminación, non”, una movilización que s’enmarca nes revindicaciones que van faciendo dende hai dellos años los coleutivos vecinales, ecoloxistes y sociales de la ciudá protestando pola descomanada contaminación que los vecinos de Xixón carecen y desixendo que se tomen midies pa finar con ella.

La convocatoria coincide cola viéspora del llamamientu mundial a manifestase pola Emerxencia climática, el 27 de Setiembre. N’Asturies la manifestación saldrá de la estación de RENFE d’Uviéu, a les 19:00. Pal mesmu díi ta convocada una fuelga de consumu, paros en delles empreses y fuelga d’estudiantes.

Con estes movilizaciones non solo se quier facer visible’l problema de la contaminacion y la crisis climática, sinón principalmente denunciar el modelu de produción actual que causa estos problemes, tendente a la globalización absoluta, incaltenibre a mediu plazu y basáu na falacia del xorrecimientu indefiníu, nel que los productos provienen de países con drechos llaborales y requisitos medioambientales inesistentes.

Un sistema que non solo ta finando con ecosistemes enteros, sinón que ta repercutiendo negativamente nel piqueñu comerciu y nos productores que si son respetuosos pa col entornu y los drechos sociales.

Llucía F. Marqués

This work is licensed under a Creative Commons Attribution 4.0 International License.